Sipas të dhënave të publikuara nga Eurostat, Indeksi i Harmonizuar i Çmimeve të Konsumit (IHÇK) në Shqipëri shënoi një rritje vjetore prej 2.3% në muajin gusht 2025.
Rritja më e lartë e çmimeve është regjistruar në grupin “Argëtim dhe kulturë”, me një rritje prej 9.9%, duke u ndjekur nga “Hotele, kafene dhe restorante” me 3.6%, “Pije alkoolike dhe duhan” me 3.3%, dhe “Mobilim, pajisje shtëpie dhe mirëmbajtje” me 2.7%. Ndërkohë, çmimet për “Ushqime dhe pije joalkoolike” u rritën me 1.7%, dhe për “Mallra dhe shërbime të ndryshme” me 1.6%. Rritje më të moderuara janë regjistruar edhe në sektorët e “Komunikimit” (+1.1%), “Shëndetit” dhe “Shërbimit arsimor” (+1.0% secili), “Qirasë, ujit dhe energjisë” (+0.6%), dhe “Veshjeve dhe këpucëve” (+0.4%). Në të kundërt, sektori i “Transportit” ishte i vetmi që shënoi ulje të çmimeve, me një rënie prej 0.7%.
Sa i përket ndryshimit mujor, inflacioni në gusht 2025 krahasuar me korrikun është rritur me 0.2%. Kjo rritje është ndikuar kryesisht nga çmimet më të larta të “Veshjeve dhe këpucëve” (+0.6%), si dhe nga rritja e kostove në “Pije alkoolike dhe duhan” dhe “Qira, ujë, lëndë djegëse dhe energji” (të dyja me +0.5%). Rritje më të vogla kanë pasur edhe “Hotele, kafene dhe restorante” dhe “Mobilim dhe pajisje shtëpie” (+0.4% secili), ndërsa “Transporti” pësoi një rënie të lehtë prej 0.2%.
Në krahasim me vendet e tjera të Bashkimit Europian, Shqipëria qëndron pranë mesatares, ndërsa diferencat brenda bllokut europian mbeten të ndjeshme. Rumania mban vendin e parë për inflacionin më të lartë në gusht 2025, me një normë vjetore mbi 8%, e ndjekur nga Estonia dhe Kroacia, me norma që luhaten mes 5% dhe 6%. Rritje të konsiderueshme janë vërejtur edhe në Sllovaki, Hungari dhe Letoni, me inflacion mes 4% dhe 5%.
Në anën tjetër, vendet me rritje më të kontrolluar të çmimeve përfshijnë Zvicrën, Çekinë dhe Francën, të cilat regjistrojnë inflacion nën 2%, ndërsa Italia, Holanda dhe Irlanda qëndrojnë pranë kësaj vlere.
Në përgjithësi, inflacioni mesatar i vendeve të BE-së arriti në 2.4%, duke mbetur afër objektivit të Bankës Qendrore Europiane dhe duke reflektuar një stabilizim të çmimeve pas pasigurive inflacioniste të dy viteve të fundit. /Skyweb.al
