Të dhënat e reja tregojnë se konsumatorët po mbështeten gjithnjë e më shumë te telefoni celular për të kryer pagesa, në vend që të mbajnë me vete karta bankare, sipas BBC.
Dy të tretat e të rriturve në Mbretërinë e Bashkuar ishin të regjistruar vitin e kaluar në të paktën një shërbim pagesash me celular, sipas një raporti vjetor të UK Finance, organizatës së sektorit bankar.
Përdorimi i telefonit për të kryer pagesa është rritur ndjeshëm vitet e fundit. Kanë kaluar një dekadë që nga lançimi i Apple Pay në Mbretërinë e Bashkuar.
Ndërsa përdorimi i parave cash vazhdon të bjerë, të dhënat sugjerojnë se ritmi i rënies po ngadalësohet dhe se kartëmonedhat dhe monedhat do të mbeten një mënyrë e rëndësishme pagese për shumë njerëz edhe pas një dekade.
Konsumatorët po ruajnë gjithnjë e më shumë të dhënat e kartave në telefonat ose orët e tyre inteligjente dhe po kryejnë pagesa pa kontakt, të mbrojtura me verifikim përmes njohjes së fytyrës ose gjurmës së gishtit, në vend që të fusin një kod PIN.
Nëntë në 10 përdorues të portofolëve elektronikë kanë të regjistruar kartën e tyre të debitit si mënyrën e paracaktuar të pagesës në telefon, ndërsa pjesa tjetër kanë regjistruar kartën e kreditit. Kjo tregon se telefonat po përdoren për pagesat e përditshme, veçanërisht nga konsumatorët më të rinj, megjithëse edhe grupmoshat më të mëdha po e rrisin përdorimin. Më shumë se 80% e personave të moshës 16 deri në 34 vjeç kryejnë rregullisht pagesa me celular, krahasuar me 22% të personave mbi 65 vjeç.
“Të dhënat tona më të fundit tregojnë se Mbretëria e Bashkuar tashmë është një ekonomi kryesisht digjitale sa i përket kryerjes dhe marrjes së pagesave”, tha Adrian Buckle, drejtues i kërkimeve në UK Finance.
Paratë cash nuk kanë “vdekur” ende
Raporti “Tregu i Pagesave në Mbretërinë e Bashkuar”, i publikuar një herë në vit, tregon se kartat e debitit, përfshirë ato të regjistruara në telefona ishin mënyra kryesore e pagesës vitin e kaluar.
Ato përbënin 54% të të gjitha pagesave të kryera në vitin 2025. Rreth 39% e pagesave u kryen pa kontakt.
Çeqet duhej të hiqeshin gradualisht deri në vitin 2018, derisa deputetët detyruan sektorin të ndryshonte qëndrim vite më parë.
Në vend të kësaj, përdorimi i tyre është tkurrur në vetëm 0.2% të pagesave të kryera në Mbretërinë e Bashkuar, me gjithsej 77 milionë çeqe të lëshuara vitin e kaluar.
Sipas parashikimeve të UK Finance, paratë cash nuk pritet të zhduken në të njëjtën mënyrë.
Kartëmonedhat dhe monedhat u përdorën në 3.9 miliardë transaksione, ose në 8% të të gjitha pagesave vitin e kaluar. Kjo shifër pritet të përgjysmohet në 4% të të gjitha pagesave në Mbretërinë e Bashkuar deri në vitin 2035, ose rreth dy miliardë transaksione.
Megjithatë, disa njerëz vazhdojnë të kenë një preferencë të fortë për përdorimin e parave cash.
“Në vend që Mbretëria e Bashkuar të shndërrohet në një shoqëri pa para cash gjatë dekadës së ardhshme, vendi do të kalojë drejt një ekonomie ku cash-i do të jetë më pak i rëndësishëm se më parë, por do të mbetet gjerësisht i vlerësuar dhe ende i preferuar nga disa njerëz”, thuhet në raport.
Gati 50 milionë njerëz përdorën bankomatet vitin e kaluar.
Nick Quin, nga Link, organizata që mbikëqyr rrjetin e bankomateve në Mbretërinë e Bashkuar, tha: “Tërheqjet e parave cash po bien në çdo pjesë të vendit. Gjithnjë e më shumë njerëz e shohin më të leverdishme dhe preferojnë të paguajnë me karta pa kontakt dhe portofolë elektronikë në telefonat inteligjentë, por miliona njerëz ende mbështeten te cash-i çdo ditë.
“Njerëzit me të ardhura më të ulëta mbështeten më shumë ose tërësisht te paratë cash për të menaxhuar buxhetin e tyre, prandaj detyra jonë është të mbrojmë aksesin te cash-i për aq kohë sa njerëzit kanë nevojë për të.”
/skyweb.al
