Agjencia e Inteligjencës Financiare dhe Inspektorati i Përgjithshëm kanë nënshkruar një marrëveshje bashkëpunimi për të forcuar mekanizmat e identifikimit, raportimit dhe parandalimit të rasteve të dyshuara të pastrimit të parave dhe financimit të terrorizmit gjatë proceseve të inspektimit.
Marrëveshja u nënshkrua nga drejtori i Agjencisë së Inteligjencës Financiare, Ervin Koçi, dhe Inspektori i Përgjithshëm, Dashnor Sula.
Sipas marrëveshjes, strukturat e Inspektoratit të Përgjithshëm do të duhet të njoftojnë menjëherë AIF-në sa herë që, gjatë kontrolleve dhe inspektimeve, konstatojnë fakte, të dhëna apo rrethana që krijojnë dyshime për veprimtari të paligjshme financiare.
Dy institucionet parashikojnë gjithashtu shkëmbim të informacionit dhe dokumentacionit që mund të jetë me interes për hetimin apo evidentimin e rasteve të dyshimta, brenda kufijve të përcaktuar nga legjislacioni.
Inspektorati i Përgjithshëm do të ketë një afat prej 10 ditësh pune për t’iu përgjigjur kërkesave për informacion të Agjencisë së Inteligjencës Financiare. Për rastet që konsiderohen urgjente, afati shkurtohet në vetëm 3 ditë.
Marrëveshja përfshin edhe trajnimin e inspektorëve për të dalluar më lehtë shenjat që mund të tregojnë për veprimtari të dyshimta financiare. AIF do t’i vërë në dispozicion Inspektoratit materiale udhëzuese, informacion mbi tipologjitë e pastrimit të parave dhe indikatorët e rrezikut, ndërsa ekspertët e saj do të përfshihen në aktivitetet trajnuese.
Synimi është që inspektorët, gjatë ushtrimit të kontrolleve në terren, të jenë në gjendje të identifikojnë më herët elemente që mund të lidhen me pastrimin e parave ose financimin e terrorizmit dhe t’ia përcjellin ato strukturës përgjegjëse për inteligjencën financiare.
Sipas dy institucioneve, marrëveshja synon të rrisë efektivitetin e mekanizmave shtetërorë kundër pastrimit të parave, përmes shkëmbimit më të shpejtë të informacionit dhe forcimit të kapaciteteve profesionale të strukturave inspektuese. /skyweb.al
