Përdorimi i kanabisit nga të moshuarit në SHBA ka arritur nivele rekord, por rritja e konsumit po shkakton gjithnjë e më shumë konflikte mes fqinjëve.
Fiorella Terenzi, një astrofizikane 64-vjeçare, nisi të ndiente erën e marihuanës që hynte në apartamentin e saj nga një njësi banimi aty pranë, në një pallat të lartë në zonën e Miamit, shkruan Wall Street Journal.
Fqinjët e saj, një çift në të 70-at, i thanë se bëhej fjalë për marihuanë mjekësore, të përdorur në sasi të vogla. Por për Terezin, aroma ishte e bezdisshme dhe situata nisi të krijonte tension mes tyre.
Rasti i saj pasqyron një problem që po shfaqet gjithnjë e më shpesh në SHBA, ndërsa brezi i Baby Boomers, tashmë në moshë pensioni, po përdor kanabis më shumë se në të kaluarën.
Kritikët e kanabisit thonë se janë të detyruar të përballen me erën dhe tymin në banesat e tyre, duke i shtyrë disa prej tyre të kërkojnë ndihmë nga policia, të kërcënojnë me masa ligjore apo të përfshihen në debate me fqinjët.
Në anën tjetër, përdoruesit e kanabisit, veçanërisht ata që e përdorin për qëllime mjekësore, argumentojnë se kanë të drejtë ta konsumojnë atë në hapësirat ku jetojnë.
Kështu, ajo që dikur mund të dukej si një çështje tipike mes të rinjve, tashmë po shfaqet edhe mes pensionistëve: njëri fqinj kërkon të konsumojë kanabis, ndërsa tjetri kërkon thjesht të mos e ndiejë erën e tij.
Rritja e përdorimit të kanabisit nga amerikanët e moshës së tretë po e kthen këtë çështje në një burim të ri konfliktesh në komunitetet e banimit, veçanërisht në shtetet ku marihuana mjekësore ose rekreative është legalizuar.
