Ethet e ndryshimeve të mundshme në qeveri dhe në drejtimin e institucioneve kanë aktivizuar ministrat dhe drejtorët e rëndësishëm, të cilët ditët e fundit janë kthyer në “blogerë” të punës së tyre.
Inspektimet, takimet në terren, mbledhjet me vartësit dhe bilancet e punës po publikohen me intensitet në rrjetet sociale. Ky aktivizim vjen në prag të shtatorit, kur përflitet se kryeministri Edi Rama mund të ndërhyjë në përbërjen e kabinetit dhe në drejtimin e disa institucioneve.
Në këtë klimë, Rama vijon sot serinë e mbledhjeve me socialistët. Në orën 11:00, kreu i PS-së do të zhvillojë një takim me të deleguarit politikë të Tiranës dhe deputetët socialistë të qarkut.
Në fokus pritet të jetë zbatimi në terren i dokumenteve “Besa” dhe “Prania Besnike”, përmes të cilave strukturave socialiste u kërkohet të shtojnë kontaktet me qytetarët dhe praninë në zonat elektorale.
Takimi zhvillohet një ditë pas mbledhjes me dyer të mbyllura në një prej vilave qeveritare në kryeqytet. Rama u kërkoi ministrave dhe drejtuesve politikë të qarqeve të zbresin në terren, të evidentojnë problematikat e qytetarëve dhe të ndjekin zgjidhjen e tyre.
Seria e takimeve nisi në Pogradec, ku kryeministri zhvilloi fillimisht një mbledhje rreth shtatëorëshe me drejtuesit politikë të 12 qarqeve, kryetarët e komisioneve parlamentare dhe deputetë të PS-së. Një ditë më pas, përpara Ramës raportuan ministrat për punën dhe objektivat e dikastereve që drejtojnë.
Në Pogradec u diskutua edhe për platformën “Pasqyra Albania”, e cila synon grumbullimin dhe ndjekjen e ankesave të qytetarëve, si dhe për mënyrën e komunikimit publik të qeverisë.
Ndryshimet e mundshme pritet të marrin formë në mbledhjen e Asamblesë Kombëtare të PS-së në fillim të shtatorit. Deri tani nuk ka emra zyrtarë, por lëvizjet e Ramës dhe aktivizimi i pazakontë i ministrave e drejtorëve në rrjetet sociale tregojnë se askush nuk dëshiron të hyjë në muajin e ndryshimeve me një bilanc të padukshëm. /skyweb.al
