Profesioni i agjentit të udhëtimeve, që dikur konsiderohej në zhdukje, po rikthehet fuqishëm në tregun e luksit, por tashmë me një rol krejtësisht të ri.
Konsulentët modernë nuk rezervojnë vetëm bileta dhe hotele. Ata funksionojnë si asistentë personalë, ndërmjetës me lidhje të fuqishme dhe zgjidhës problemesh, për të cilët “jo” rrallëherë është përgjigjja përfundimtare.
Një konsulente udhëtoi deri në Paris për të blerë kroasantin më të madh të qytetit dhe për t’ia dërguar në Miami vajzës së një miliarderi. Një kliente tjetër kërkoi që frigoriferi i saj të mbushej vetëm me ushqime të bardha, për të mos i “prishur energjinë”.
Të dhënat e rrjetit ndërkombëtar Virtuoso tregojnë se shitjet gjatë vitit 2026 pritet të rriten me 21%. Rezervimet e hoteleve që kushtojnë mbi 1,500 dollarë nata janë rritur me 37%, ndërsa udhëtimet me vlerë mbi 50 mijë dollarë me 47%.
Në këtë treg, luksi nuk është më vetëm suita me pesë yje, por sigurimi i një tavoline në një restorant të rezervuar prej muajsh, një vizitë private, ndryshimi i itinerarit brenda pak orësh dhe garantimi i privatësisë së plotë.
Një kompani organizoi një propozim martese në Toskanë, ku unaza u gropos në një pronë private dhe u “zbulua” nga një qen gjatë kërkimit për tartuf. Udhëtimi treditor kushtoi rreth 50 mijë dollarë.
Në një rast tjetër, një udhëtim nga shkretëtira Atacama drejt Antarktidës, me jaht luksoz, helikopter, nëndetëse dhe vizitë te pinguinët perandorë, kushtoi 300 mijë dollarë.
Për njerëzit që mund të blejnë pothuajse gjithçka, luksi i vërtetë është koha, aksesi dhe mungesa e çdo shqetësimi. Konsulentët njohin çdo preferencë të klientëve dhe janë në dispozicion 24 orë në ditë.
Disa prej tyre fitojnë shuma me pesë apo gjashtë shifra në vit, duke e shndërruar çdo kërkesë, sado e pazakontë, nga “e dua” në “u realizua”. /skyweb.al
