Kompania ajrore greke Aegean Airlines ka njoftuar se ka porositur edhe dy avionë të tjerë Airbus A321XLR, duke thelluar më tej strategjinë e saj për zgjerim në tregje të largëta me avionë me trup të ngushtë.
Ky zhvillim vjen pas porosisë së mëparshme të bërë më 14 mars 2025 për tetë A321neo në versionin standard.
Me kapacitet të zgjeruar fluturimi, avionët e rinj XLR do t’i mundësojnë Aegean-it të fluturojë drejt destinacioneve më të largëta në Azi dhe konkretisht drejt Indisë, një treg që kompania po synon me intensitet.
Aegean ka bërë të ditur se me ardhjen e avionëve të rinj do të hapë linja të reja për në Mumbai dhe Delhi duke i lidhur për herë të parë këto dy qytete indiane me Athinën.
Dy avionët A321XLR do të kenë një konfigurim me dendësi të ulët, vetëm 138 vende në total:
- 24 suita biznesi me ulëse që shtrihen plotësisht si shtrat, të gjitha me dalje të drejtpërdrejtë në korridor,
- dhe 114 ulëse ekonomike.
Dorëzimi i avionëve parashikohet të bëhet në dhjetor 2025 dhe janar 2026, ndërsa fluturimet drejt Indisë pritet të nisin në mars 2026.
Linja për në Delhi do të operohet me pesë frekuenca në javë, ndërsa Mumbai do të shërbehet tre herë në javë.
Me këtë porosi të re, Aegean e çon në 60 numrin total të avionëve të porositur nga familja A320neo, prej të cilëve 36 do të jenë dorëzuar deri në fund të korrikut 2025.
Flota e mbetur për t’u dorëzuar përfshin 18 A321neo, katër A321LR dhe dy A321XLR.
Që prej vitit 2024, kompania ka nisur të ndërtojë një strategji të re për linjat e gjata me avionë me trup të ngushtë.
Katër avionët A321LR që Aegean ka futur në flotë i lejojnë asaj të synojë destinacione si Bangalore, Seychelles, Nairobi, Almaty dhe Lagos, ndërsa me modelin XLR, kapaciteti do të zgjerohet edhe më tej për të mbuluar destinacione si Male (Maldive), e gjithë India dhe pika të caktuara në Afrikën Jugore.
Airbus A321XLR (Extra Long Range) është versioni më i avancuar i familjes A321 dhe aktualisht avioni me trup të ngushtë me rrezen më të gjatë në botë.
Çfarë e bën të veçantë?
- Rreze fluturimi deri në 8.700 km, falë një depoje shtesë karburanti.
- Kapacitet për 180–220 pasagjerë, në varësi të konfigurimit.
- Kosto më e ulët operative për kilometër krahasuar me avionët me trup të gjerë.
- E përshtatshme për fluturime transatlantike dhe linja të gjata me kërkesë mesatare.
Pse ka rëndësi për kompanitë ajrore?
- U lejon të hapin linja të reja të largëta pa pasur nevojë për avionë të mëdhenj dhe të shtrenjtë si Boeing 787 apo Airbus A330.
- Përshtatet më mirë me tregje në zhvillim ose me kërkesë të paqëndrueshme, ku një avion më i vogël është më ekonomik.
- Ideale për aeroporte të vogla ose të mesme që nuk mund të përballojnë fluksin e avionëve me trup të gjerë.
Për këtë arsye, A321XLR po shihet si zgjidhje fleksibël për fluturimet ndërkontinentale, duke transformuar strategjitë e transportuesve rajonalë që duan të hyjnë në tregun e linjave të gjata./skyweb.al
