Një udhëtim në klasin e parë është kthyer në fundin e karrierës për Arthur Lundeen, një agjent imobiliar 67-vjeçar nga Arizona, pas një incidenti të rëndë në bordin e një avioni të “American Airlines”.
Ngjarja ndodhi në fluturimin 618, i cili ishte nisur nga Dallas drejt Newark. Sipas dëshmitarëve, Lundeen nisi të bëhej agresiv, duke përdorur fyerje raciste dhe homofobike ndaj pasagjerëve dhe stafit të avionit.
Situata u përshkallëzua deri në përplasje fizike, duke detyruar disa pasagjerë, mes tyre edhe një ish-punonjës të forcave të rendit, ta neutralizonin. Ai u lidh në sedilje me shirit ngjitës, ndërsa duart iu siguruan me lidhëse plastike.
Për shkak të incidentit, avioni ndryshoi itinerarin dhe kreu ulje të paplanifikuar në Aeroportin Baltimore–Washington, ku 67-vjeçari u arrestua nga policia. Fluturimi vijoi më pas drejt Newarkut.
Lundeen është akuzuar për sulm të shkallës së dytë dhe sjellje të çrregullt. Ai u lirua pas paraqitjes së parë në gjykatë më 4 shtator, ndërsa seanca e radhës është caktuar për më 19 tetor.
Pas publikimit të pamjeve, kompania “Long Realty”, ku Lundeen kishte punuar prej vitesh, njoftoi ndërprerjen e menjëhershme të marrëdhënies me të, duke deklaruar se një sjellje e tillë bie ndesh me vlerat e saj.
Në profilin e tij profesional, tashmë të hequr, Lundeen prezantohej si agjent, ndërmjetës i asociuar dhe anëtar me post drejtues në këshillin ekzekutiv të kompanisë.
Ndërkohë, FBI-ja po heton incidentin për të përcaktuar nëse ndaj tij do të ngrihen edhe akuza federale për ndërhyrje në punën e ekuipazhit./skyweb.al
