Gati gjysma e shqiptarëve deklarojnë se e kanë të vështirë të përballojnë shpenzimet e zakonshme mujore.
Sipas Eurostatit, 32.9% e popullsisë e mbyll muajin me vështirësi, ndërsa 13.4% me shumë vështirësi. Të marra së bashku, dy kategoritë përfaqësojnë 46.3% të popullsisë.
Me këtë rezultat, Shqipëria renditet e dyta në Europë pas Greqisë, ku 67% e popullsisë raporton vështirësi financiare. Mesatarja e Bashkimit Europian është vetëm 17.6%.
Të dhënat për Shqipërinë i përkasin vitit 2023, ndërsa mesatarja e BE-së vitit 2025. Në rajon, treguesi arrin në 43.8% në Maqedoninë e Veriut, 37.9% në Malin e Zi dhe 31.2% në Serbi.
Sipas Monitor, vështirësitë lidhen edhe me pagat e ulëta. Në vitin 2025, paga mesatare bruto në Shqipëri ishte rreth 860 euro, kundrejt 1,290 eurove në Serbi, 1,206 eurove në Malin e Zi dhe rreth 1,100 eurove në Maqedoninë e Veriut.
Ndërkohë, çmimet e ushqimeve në Shqipëri arritën në 102.9% të mesatares së BE-së. Kjo do të thotë se shqiptarët paguajnë për ushqimet më shumë se mesatarja europiane, megjithëse marrin paga disa herë më të ulëta.
Eurostat e mat këtë tregues duke i pyetur familjet nëse të ardhurat e tyre totale mjaftojnë për të paguar shpenzimet e zakonshme, përfshirë kostot e banesës.
