Kryeministri Edi Rama mbajti të premten fjalimin e tij në Asamblenë e Përgjithshme të Kombeve të Bashkuara në New York.
Fjala e kreut të qeverisë u përqendrua te Inteligjenca Artificiale, avantazhet që ajo sjell, por edhe te rreziqet që lidhen me keqpërdorimin e saj.
“Ne jemi një komb që po e jetojmë të ardhmen, të cilën shumë po e debatojnë. Kam një mesazh të thjeshtë dhe këtë ua detyrohemi të gjithë juve: rreziku më i madh nuk është se IA do të ndalojë njerëzimin, por se mund të bindë njerëzit e gabuar”, tha Rama.
Duke i lidhur zhvillimet teknologjike me Shqipërinë, kryeministri u mburr me krijimin e ministres virtuale Diella.
“Shqipëria u bë vendi i parë që solli ministren e parë me Inteligjencë Artificiale, Diellën. E bëmë për t’i bërë procedurat më transparente dhe shtetin më llogaridhënës”, deklaroi Rama.
Ai theksoi se përdorimi i Inteligjencës Artificiale nuk mund të zëvendësojë përgjegjësinë ligjore të njeriut.
“Asnjë algoritëm nuk mban mandat. Pas çdo vendimi me ndikim publik duhet të mbetet një mandat ligjor”, tha kryeministri.
Duke folur për avantazhet e teknologjisë, Rama deklaroi se është Inteligjenca Artificiale ajo që duhet t’i shërbejë njerëzimit dhe jo e kundërta.
“Stimujt ekonomikë që rrethojnë IA-në shpërblejnë gjithmonë e më tepër zëvendësimin e përpjekjes njerëzore, në vend të zgjerimit të kapacitetit”, u shpreh ai.
Sipas Ramës, përdorimi i pakontrolluar i teknologjisë mund t’i bëjë njerëzit më pak të aftë dhe të dobësojë përgjegjësinë njerëzore.
“Shkruaje kodin që të mos më duhet ta kuptoj, shkruaje raportin që të mos mendoj, bëj një gjykim dhe merr një vendim që të mos mbaj përgjegjësi”, tha Rama.
Ai paralajmëroi se një qytetërim që ia delegon dijen dhe gjykimin teknologjisë mund të përfundojë duke ia deleguar asaj edhe përgjegjësinë.
“Ne mund të ndërtojmë një IA që thjesht përgjigjet, në vend që qenia njerëzore të bëhet e varur prej saj”, deklaroi kryeministri.
Rama shtroi edhe disa pyetje mbi përgjegjësinë që duhet të mbetet te njeriu: “Çfarë mësoi qenia njerëzore? Kush e kuptoi vendimin? Kush mund ta kuptojë dhe të përgjigjet kur ai është i gabuar?”
Në fjalimin e tij, kryeministri nuk la jashtë vëmendjes as rreziqet që lidhen me keqpërdorimin e Inteligjencës Artificiale.
Ai përmendi veçanërisht kërcënimin ndaj lirisë së shprehjes dhe përdorimin e teknologjisë si armë për shumëfishimin e informacionit të rremë.
“Kur gënjeshtra shumëfishohet miliarda herë, e vërteta nuk ka nevojë të censurohet. Ajo varroset”, tha Rama.
