Aeroporti Ndërkombëtar i Tiranës ka shënuar kulmin e trafikut ajror më 4 gusht 2025, me rreth 12 fluturime në orë dhe një total prej 51 mijë pasagjerësh të përpunuar brenda ditës, mesatarisht 35 pasagjerë në minutë.
Ky është rekordi më i lartë i regjistruar ndonjëherë, duke tejkaluar shifrën e 14 gushtit të vitit të kaluar me 47 fluturime dhe 6 mijë pasagjerë më shumë.
Rritja e trafikut ka ardhur edhe falë shtimit të linjave të reja drejt Nantes dhe Bordeaux, duke zgjeruar lidhjet e Tiranës me destinacione të reja evropiane.
Vetëm në qershor 2025, aeroporti ka pritur 1.15 milionë pasagjerë dhe ka regjistruar 6,830 fluturime që e lidhin kryeqytetin me 103 destinacione në 31 shtete, të operuara nga 27 linja ajrore.
Destinacionet më të kërkuara mbeten qytetet italiane dhe britanike, me Milanon, Londrën, Romën, Bolognën dhe Venecian në krye të listës.
Pritet që gushti të thyejë edhe një herë rekordin mujor, i nxitur jo vetëm nga fluksi i turistëve të huaj, por edhe nga numri i lartë i shqiptarëve që zgjedhin këtë periudhë për të udhëtuar jashtë vendit. /skyweb.al
