Për pak sekonda mund të kishte ndodhur një tragjedi në ajër. Avioni presidencial amerikan, Air Force One, me ish-presidentin Donald Trump në bord, është përfshirë në një incident serioz ajror pranë Long Island, ku u afrua rrezikshëm me një avion pasagjerësh të linjës Spirit Airlines.
Sipas raportimeve nga mediat amerikane, avionët ishin duke fluturuar në drejtime të kundërta në një zonë me trafik të dendur ajror, kur sistemet e kontrollit të trafikut dhanë alarmin për afrim të rrezikshëm.
Të dhënat e radarit tregojnë se avionët ndodheshin në një distancë horizontale prej rreth 13-18 kilometra dhe me një diferencë lartësie rreth 2,700 metra. Edhe pse këto distanca mund të duken të sigurta teknikisht, për avionë që udhëtojnë me shpejtësi të lartë, çdo afrim i paparashikuar mund të jetë fatal.
Burime nga Administrata Federale e Aviacionit (FAA) bëjnë me dije se falë ndërhyrjes së menjëhershme të kontrollorëve të trafikut ajror dhe reagimit të shpejtë të pilotëve, përplasja u shmang në kohë. Avioni i linjës Spirit Flight 1300, i nisur nga Fort Lauderdale drejt Bostonit, ndryshoi kurs në momentet e fundit.
FAA ka nisur një hetim për të sqaruar rrethanat e incidentit dhe për të përcaktuar nëse janë ndjekur të gjitha protokollet e sigurisë. Ndërkohë, përfaqësues të Spirit Airlines kanë deklaruar se ekuipazhi i tyre ka ndjekur të gjitha udhëzimet e dhëna nga kulla e kontrollit.
Fatmirësisht, asnjë nga avionët nuk ka pësuar dëmtime dhe nuk raportohet për të lënduar. Megjithatë, incidenti ka ngritur shqetësime serioze për koordinimin në hapësirën ajrore amerikane, sidomos kur përfshihen avionë qeveritarë. /Skyweb.al
