Kur flasim për punësimin në Shqipëri, të dhënat tregojnë se jo të gjithë qarqet ecin me të njëjtin ritëm. Në vitin 2024, shkalla e punësimit dhe ajo e papunësisë ofrojnë një panoramë të ndryshme të tregut të punës, duke nxjerrë në pah se cilët qytetarë janë më aktivë në ekonomi.
Sipas statistikave, Kukësi kryeson listën e qarqeve më punëtorë, me një shkallë punësimi prej 70.9% për të gjithë popullsinë, ndërsa papunësia mbetet relativisht e moderuar, me 8.8%. Në radhë të parë pas Kukësit vijnë Gjirokastra dhe Fieri, ku mbi 66% e qytetarëve janë të punësuar.
Kur e analizojmë situatën sipas gjinisë, diferencat janë të dukshme. Tek burrat, Kukësi vazhdon të kryesojë me 74.1% të të punësuarve. Ndërkohë, tek gratë janë sërish Kukësi dhe Gjirokastra të cilat shfaqin shkallë të lartë punësimi, respektivisht 67.9% dhe 62.3%, një tregues i përfshirjes aktive të grave në punë në këto qarqe.
Në anën tjetër, qarqet si Lezhë dhe Vlorë përballen me sfida më të mëdha në tregun e punës. Lezha ka shkallë të ulët punësimi për të gjithë popullsinë, me vetëm 47.6%, dhe një papunësi që shkon deri në 17.8%, ndërsa tek gratë kjo shkallë bie në 40.9%, duke treguar një përqindje të konsiderueshme të grave jashtë tregut të punës. Vlorë nuk është shumë larg, me një punësim prej 51.7% dhe papunësi 12.5%.
Elbasani po ashtu renditet mes qarqeve me normën më të lartë të papunësisë, ndërkohë që për gratë kryeson listën me shkallën më të lartë të të papunëve.
Pra, kush janë më puntorët? Përgjigjja është qartë e lidhur me Kukësin, ndjekur nga Gjirokastra dhe Fieri, qarqe ku qytetarët, pavarësisht gjinisë, regjistrojë norma më të larta punësimi. Ndërsa në qarqet e Lezhës dhe Vlorës, ka ende hapësirë për të përmirësuar pjesëmarrjen në tregun e punës dhe për të ulur papunësinë./tvscan
