Aleanca e Profesionistëve të Lirë, i ka dërguar një letër zyrtare Ministrisë së Financave, përmes së cilës shpreh shqetësimin se projektvendimi për përcaktimin e çmimeve të reja të referencës për shitblerjen e apartamenteve në rrethe, nuk përputhet me realitetin e tregut të pasurive të paluajtshme dhe rrezikon të sjellë deformime serioze në çmimet mesatare të banesave.
HARTAT/ Dalin çmimet e referencës për çdo bashki në vend, sa kushtojnë apartamentet
Sipas APL, drafti aktual mbështetet në një metodologji jo transparente dhe vendos një vlerë minimale nën të cilën transaksionet nuk do të njihen, duke penguar reflektimin e rasteve kur çmimet e apartamenteve pësojnë ulje reale në treg.
Në këto kushte, Profesionistët paralajmërojnë se politikat e tilla jo vetëm nuk pasqyrojnë tendencën e tregut, por përkundrazi, nxisin rritjen artificiale të çmimeve të shitjes së apartamenteve në të gjithë vendin.
Në letrën drejtuar ministrit të Financave theksohet se projektvendimi nuk garanton filtrimin e transaksioneve të fryra apo të lidhura me veprimtari të dyshimta, si pastrimi i parave, të cilat mund të shtrembërojnë më tej çmimet mesatare të tregut. Sipas APL, përdorimi i projekteve të ardhshme të zhvillimit urban si indikatorë për rritjen e çmimeve referuese, pa u bazuar në të dhëna reale të tregut të sotëm, përbën një tjetër rrezik për deformimin e tregut.
Një tjetër problematikë e ngritur lidhet me përfshirjen e ndërtimeve pa leje ose në proces legalizimi në bazën e vlerësimit fiskal, çka sipas profesionistëve krijon precedent të rrezikshëm dhe cenon përpjekjet për formalizimin e sektorit të ndërtimit. APL thekson se metodologjia aktuale e propozuar i hap rrugë arbitraritetit administrativ dhe rrezikon të përfundojë si një instrument për rritjen e të ardhurave fiskale, dhe jo si një mekanizëm për pasqyrimin real të ofertës dhe kërkesës në tregun e banesave.
Në reagimin e saj, Aleanca rikujton se i është drejtuar më herët ministrit të Financave me kërkesën që banesa e parë e qytetarëve të përjashtohet nga taksa e ndërtesës, pasi ndryshime të tilla ndikojnë drejtpërdrejt shtresat e mesme dhe familjet që zotërojnë vetëm një pronë për banim.
APL kërkon rishikimin e thelluar të projektvendimit dhe vendosjen e kritereve objektive, të matshme dhe të verifikueshme, për të garantuar transparencë, siguri juridike dhe neutralitet fiskal, në mënyrë që tregu i banesave të mos jetë viktimë e ndërhyrjeve administrative që çojnë në rritje të kërkesave tatimore dhe deformim të çmimeve. /skyweb.al
