Pak ditë para nisjes së vitit të ri akademik, Ministria e Ekonomisë ka miratuar rregullat e reja për rekrutimin e stafit në institucionet e Arsimit dhe Formimit Profesional, duke futur për herë të parë pozicionin e Oficerit të Sigurisë.
STATISTIKAT/ Ndryshon trendi, të rinjtë po regjistrohen më shumë në shkollat e mesme profesionale
Ky rol i ri synon të garantojë rendin dhe sigurinë brenda ambienteve të shkollave profesionale, si dhe të ndihmojë në parandalimin dhe menaxhimin e situatave problematike që prekin nxënësit dhe stafin.
Sipas udhëzimit, Oficeri i Sigurisë do të ketë detyra që lidhen me marrjen e masave parandaluese për situata që cenojnë sigurinë fizike dhe psikologjike të nxënësve, monitorimin e sjelljes së tyre dhe ndërhyrjen në rast shkeljesh të rënda të rregullores së brendshme.
Ai do të raportojë periodikisht për rastet problematike, do të japë ndihmesë në hartimin e masave disiplinore dhe do të bashkëpunojë me strukturat përkatëse në rastet e dhunës, bullizmit, abuzimit apo shkeljeve të tjera të etikës. Një tjetër detyrë e rëndësishme do të jetë informimi dhe ndërgjegjësimi i komunitetit shkollor për çështje që lidhen me sigurinë.
Rekrutimi i oficerëve do të bëhet sipas një procedure të standardizuar, në përputhje me rregullat e shërbimit civil. Kandidatët duhet të kenë diplomë të ciklit të dytë ose të barasvlershme me të në fusha si edukimi, shkencat sociale, sociologjia, psikologjia apo drejtësia, si dhe përvojë në çështje sigurie, etikë profesionale dhe aftësi ndërpersonale.
Vendimi i ri vjen paralelisht me udhëzimin e përbashkët të Ministrisë së Arsimit dhe Ministrisë së Ekonomisë për vitin shkollor 2025–2026, i cili përfshin rregullat për regjistrimin e nxënësve, shpërndarjen e teksteve falas për arsimin bazë dhe ndalimin e përdorimit të celularëve në ambientet shkollore.
Masat e reja përfshijnë gjithashtu zbatimin e Planit Kombëtar për parandalimin e dhunës, ngritjen e ekipeve “antibulling” dhe organizimin e veprimtarive sensibilizuese gjatë vitit shkollor.
Ky hap shihet si pjesë e një strategjie më të gjerë për të përmirësuar sigurinë në shkolla dhe për të garantuar një mjedis më të shëndetshëm arsimor për nxënësit në të gjithë vendin. /skyweb.al
