Qeveria gjermane duhet të vendosë shpejt nëse do të vazhdojë me projektin e përbashkët franko-gjerman për zhvillimin e një avioni të ri luftarak, apo do të tërhiqet prej tij sipas Reuters.
Paralajmërimi u bë nga Christoph Schmid, anëtar i komisionit të mbrojtjes në Bundestag dhe përfaqësues i socialdemokratëve të ministrit të mbrojtjes Boris Pistorius, në prag të bisedimeve të nivelit të lartë mes presidentit francez Emmanuel Macron dhe kancelarit gjerman Friedrich Merz.
Sipas Reuters, Berlini fajëson industrinë franceze për bllokimin e fazës së dytë të programit FCAS (Future Combat Air System), duke kërkuar drejtim të vetëm nga Dassault Aviation.
Ky ngërç po rrezikon nisjen e ndërtimit të demonstruesve ajrorë, që ishte planifikuar për fundin e këtij viti.
FCAS, një projekt me kosto mbi 100 miliardë euro, përfshin Dassault, Airbus dhe kompaninë spanjolle Indra.
Megjithatë, që prej fillimit ai është shoqëruar nga mosmarrëveshje mbi ndarjen e punës dhe të drejtave të pronësisë intelektuale, duke sjellë vonesa të përsëritura.
“Sa më shumë shtyhet vendimi, aq më e parealizueshme bëhet zbatimi i FCAS,” tha Schmid, duke shtuar se ndarja e Gjermanisë dhe Francës nuk do të ishte katastrofë, ashtu si në rastin e Eurofighter-it ku Gjermania bashkëpunoi me Britaninë dhe Italinë, pa përfshirjen e Parisit.
Deputeti gjerman sugjeroi që Berlini të porosisë 60 avionë Eurofighter të rinj deri në vitin 2029 për të zëvendësuar flotën e vjetër Tornado, ndërsa në planin afatmesëm të shqyrtohen alternativa të tjera: një zhvillim i avancuar i Eurofighter, një projekt kombëtar, pjesëmarrja në programin rival GCAP (Britani–Itali–Japoni), apo edhe një bashkëpunim me partnerë të rinj si Suedia./skyweb.al
