Apple prezanton iPhone 17 – katër modele të reja dhe surpriza “Air”, më i holli ndonjëherë
Apple prezantoi zyrtarisht serinë e re iPhone 17, duke sjellë katër modele: iPhone 17, iPhone 17 Air, iPhone 17 Pro dhe iPhone 17 Pro Max. Në qendër të eventit ishte iPhone 17 Air, i cilësuar si modeli më i hollë i prodhuar ndonjëherë nga kompania, me vetëm 5.6 mm trashësi dhe kornizë titani të klasit hapësinor. Ky model vjen i pajisur me çipin e ri A19 Pro, që ofron performancë grafike trefish më të lartë se gjenerata e mëparshme, si dhe një kamerë 48 MP me teknologji të avancuar për foto dhe video.
Modeli bazë, iPhone 17, ka ekran 6.3 inç me teknologjinë ProMotion 120 Hz, kamerë të dyfishtë “Dual Fusion” 48 MP dhe bateri më jetëgjatë. Çmimi i tij fillon nga 799 dollarë. Ndërsa modelet Pro dhe Pro Max sjellin sisteme kamerash të avancuara me teleobjektiv që ofron zoom optik deri në 8x, bateri më të fuqishme dhe performancë të përmirësuar. Çmimet nisin nga 1,099 dollarë për Pro dhe 1,199 dollarë për Pro Max.
Të gjitha modelet do të funksionojnë me sistemin operativ iOS 26 dhe me përmirësime të ndjeshme në Apple Intelligence. Apple theksoi gjithashtu përdorimin e materialeve të ricikluara, me iPhone 17 Air të prodhuar deri në 80% nga titan i ricikluar. Para-porositë do të nisin më 12 shtator, ndërsa telefonat do të jenë të disponueshëm në treg nga 19 shtatori.
Në bursë, reagimi ishte i matur, me një rënie të lehtë të aksioneve të Apple pas prezantimit, pasi investitorët duket se prisnin më shumë risi në fushën e inteligjencës artificiale dhe dizajneve të palosshme. /skyweb.al
