Nëse arsyeja për të udhëtuar janë plazhet, malet apo monumente historike, një trend i ri në botën e turizmit po zë gjithnjë e më shumë vend. Bëhet fjalë për turizmin e djathit. Një potencial I tillë turistik poi shfrytëzohet në Paris.
Në qytetin e dashurisë, tashmë mund të gjesh edhe një vend për dashamirësit e djathit. “Musée Vivant du Fromage” është muzeu më i ri që i kushtohet krejtësisht djathit francez, i cili ofron një udhëtim të gjallë përmes historisë, përpunimit dhe shijes së mbi 1,200 llojeve të djathërave të prodhuar në Francë.
Vizitorët mund të shohin nga afër procesin tradicional të prodhimit të djathit, të marrin pjesë në degustime dhe të mësojnë për lidhjen e fortë mes natyrës, kulturës dhe gastronomisë franceze.
Kjo qasje e re ndaj udhëtimit nuk është një ide kalimtare. Sipas ekspertëve të turizmit, përvojat ushqimore, sidomos ato që lidhen me prodhimin artizanal si djathi apo vera janë ndër tendencat më të forta për dekadën e ardhshme. Në Francë, pritet që turizmi kulinar të rritet me mbi 16%, me zona rurale që po përfitojnë nga kjo kthesë drejt traditës dhe origjinës.
Ajo që e bën këtë turizëm tërheqës është autenticiteti. Djathi nuk është thjesht një produkt. Ai është rezultat i një zinxhiri natyror ku çdo hallkë ka rëndësi. Për shembull, për të prodhuar një rrotë djathi Comté duhen rreth 400 litra qumësht. Kjo lidhje mes natyrës dhe shijes është pikërisht ajo që turistët po kërkojnë gjithnjë e më shumë. /Skyweb.al
