Prokuroria dhe Krimi Ekonomik kanë mësyrë gjatë ditës së sotme në ambientet kompanisë farmaceutike CFO Pharma duke sekuestruar të gjithë dokumentacionin e rimbursimeve pas një hetimi të gjerë për një skemë gjigantë mashtrimi me rimbursimet si edhe kontrabandë barnash.
Kapitali raportoi më herët sekuestrimi i dokumentacionit është shtrirë dhe në dy kompanitë satelite të CFO Pharmas, Pharma Plus dhe Medyx Albania.
Prokuroria dyshon se të tre kompanitë janë përfshirë në një skemë faturash false dhe shitjes fiktive të barnave me qëllim për të përfituar rimbursime.
Në qendër të hetimit janë veçanërisht dy medikamente që përdoren për sëmundjen e astmës, të quajtur respektivisht Foster dhe Trimbow.
Ndërkohë, siç mëson Skyweb.al, pjesë e hetimit është edhe një bar i prodhuesit turk “Ali Raif”. Bëhet fjalë për medikamentin “Razina”, i cili nga verifikimet paraprake që ka bërë prokuroria rezulton të jetë shitur në “letra” gati dyfishin e sasisë së produktit të importuar.
Skyweb.al mëson se Prokuroria dyshon se nëpërmjet një skeme të mirëfilltë mashtrimi me rimbursimin e barnave, vetëm me këtë medikament, dëmi i shkaktuar buxhetit të shtetit të jetë rreth 1 milionë euro.
Mësohet se nga 20 mijë kuti të importuara janë rimbursuar 38 mijë kuti. Prokuroria dyshon se skema është aplikuar përmes dy kompanive të tjera si edhe një rrjeti farmacish.
Skema me medikamentet“ Foster” dhe “Trimbow”.
Hetimet duket se nisën pas të dhënave për një skemë mashtrimi me ribursimin me barnat “Foster” dhe “Trimbow”.
Të dy ata, janë medikamente të cilët përdoren për trajtimin e astmës. Të dy këto barna janë produkte ekskluzive, që do të thotë se kanë vetëm një furnitor në tregun shqiptar, pra kompaninë italiane Chiesi.
Rrjedhimisht shifrat e rimbursimit të këtyre ilaçeve nga FSDKSH duhet të përputhen plotësisht me ato që ka shitur në Shqipëri kompania prodhuese italiane.
Por sipas dokumentave të siguruara nga Kapitali, për periudhën 2021 deri në muajt e parë të këtij viti, Fondi i Sigurimit të Detyrueshëm të Kujdesit Shëndetësor ka rimbursuar rreth 20 mijë kuti më shumë të ilaçit Foster pompe se sa ka furnizuar kompania italiane dhe dhjetëra mijë të tjera të ilaçit Trimboë.
Të gjendur përballë këtij skandali, italianët investiguan më tej për të kuptuar se kush po i dëmtonte. Hetimet e tyre zbuluan një skemë gjigande vjedhje me rimbursimet fiktive, në qendër të së cilës qëndron kompania CFO Pharma, dy kompani satelite të saj, Pharma plus dhe Medyx Albania si dhe disa farmaci.
Më konkretisht, Pharma Plus dyshohet se ka deklaruar inventar mbi 3200 kuti Foster dhe Trimboë, pa asnjë blerje të këtyre produkteve. Ndërsa Medyx ka deklaruar mbi 16 mijë kuti pa bërë asnjë blerje.
Pasi i kanë deklaruar fiktivisht në inventaret e tyre këto medikamente, të dyja kompanitë si Pharma Plus ashtu dhe Medyx, dyshohet t’ia kenë shitur po fiktivisht CFO Pharmas dhe zinzhiri i shitjeve fiktive përfundonte në disa farmaci duke vjedhur padrejtësisht paratë e rimbursimeve. /skyweb.al
