Vetëm rreth një në pesë persona në Shqipëri bëjnë blerje në internet, duke e renditur vendin ndër më mosbesuesit në rajon për tregtinë elektronike. Sipas raportit “Përmbledhja Globale Digjitale 2025” të revistës CEOWORLD, vetëm 26.5 për qind e popullsisë në Shqipëri kryejnë blerje me pakicë online, një përqindje dukshëm më e ulët se ajo e vendeve fqinje.
Në Malin e Zi, për shembull, blerjet online kryhen nga rreth 36 për qind e qytetarëve, ndërsa në Bosnjë dhe Serbi ky tregues është përkatësisht 36 dhe 35.25 për qind. Maqedonia e Veriut ka një përfshirje prej 31.4 për qind, duke treguar se rajoni po ecën më shpejt në drejtim të digjitalizimit të tregtisë.
Raporti analizon disa tregues si koha që qytetarët kalojnë në internet çdo javë, frekuencën e blerjeve online dhe pjesën e të ardhurave që shpenzohet përmes kanaleve digjitale. Sipas tij, niveli i ulët i përdorimit të blerjeve online në Shqipëri lidhet me mungesën e besimit te platformat digjitale dhe frikën për sigurinë e pagesave. Ekspertët vlerësojnë se rritja e ndërgjegjësimit për sigurinë kibernetike dhe përmirësimi i shërbimeve logjistike mund të ndihmojnë në shtimin e besimit të konsumatorëve dhe zgjerimin e tregtisë online në vend. /Skyweb.al
