Policia e Shtetit do të nisë nga e hëna një operacion të gjerë për ndalimin e qarkullimit të monopatinave elektrike në rrugët dhe trotuaret urbane, pas rritjes së ndjeshme të aksidenteve që përfshijnë këto mjete.
Në fjalën e tij, Drejtori i Përgjithshëm i Policisë së Shtetit, Drejtues Madhor Ilir Proda, deklaroi se gjatë vitit 2024 janë raportuar 991 raste aksidentesh me monopatina, përfshirë edhe raste me pasoja të rënda dhe fatalitete.
“Sipas analizës sonë, përdorimi i këtyre mjeteve po shkakton një rrezik të menjëhershëm për sigurinë publike. Për këtë arsye, kemi përcaktuar një procedurë standarde, bazuar në ligjin ‘Për Policinë e Shtetit’, për ndëshkimin e drejtuesve dhe bllokimin administrativ të këtyre mjeteve,” deklaroi Proda.
Sipas tij, operacioni i ri do të zbatohet në të gjitha qytetet e vendit dhe do të përfshijë ndalimin e qarkullimit të monopatinave në rrugë urbane dhe trotuare, deri në hartimin e një rregulloreje të re që do të përcaktojë rregullat dhe standardet e sigurisë për përdorimin e tyre.
“991 raste të raportuara janë më shumë se sa mjaft për ta ndalur menjëherë këtë risi të rrezikshme në qarkullimin rrugor, derisa të kemi një kornizë të qartë ligjore dhe teknike, të bazuar në praktikat më të mira ndërkombëtare,” shtoi Drejtori i Përgjithshëm i Policisë.
Proda kërkoi mirëkuptimin e qytetarëve për këtë masë të përkohshme, duke theksuar se ajo ka për qëllim vetëm rritjen e sigurisë publike dhe parandalimin e ngjarjeve të rënda në rrugë.
