Shtatori ka rezultuar një muaj i suksesshëm për turizmin, duke kombinuar fluksin e vizitorëve të verës me rikthimin e tureve kulturore. Si rrjedhojë, strukturat akomoduese raportuan rritje të ndjeshme të vizitorëve krahasuar me një vit më parë.
Instituti i Statistikave publikoi shifrat zyrtare për muajin shtator, duke theksuar se struktura pritëse panë rritje si të vizitorëve, ashtu edhe të netëve të qëndrimit. Sipas INSTAT, numri total i vizitorëve u rrit me 31.7%. Vizitorët jo-rezidentë shënuan rritje më të lartë, me 37.8%, ndërsa vizitorët rezidentë u rritën me 15.1%.
Netët e qëndrimit patën gjithashtu rritje prej 19.6%, ku ato nga vizitorët e huaj u rritën me 25.1%, ndërsa ato të vizitorëve vendas me 4.8%. Rritja më e ndjeshme e vizitorëve të huaj u regjistrua në zonat bregdetare, me 44.1%, dhe në hotelet apo strukturat e ngjashme akomoduese, me 32.1%.
Për sa i përket origjinës së vizitorëve, Kosova renditet e para me 13%, e ndjekur nga Polonia me 11% dhe Italia me 10%. Gjermania dhe Franca përbënin respektivisht 9% dhe 8%, ndërsa gjysma e vizitorëve vinin nga vende të tjera. Nivelit të shfrytëzimit të dhomave në hotele arriti në 52.7%, krahasuar me 40.4% në shtatorin e vitit 2024.
Ministria e Turizmit, Kulturës dhe Sportit raportoi gjithashtu rezultate pozitive për muajin tetor. Sipas të dhënave të publikuara të hënën, hyrjet e shtetasve të huaj gjatë periudhës janar–tetor 2025 u rritën me 7% krahasuar me të njëjtën periudhë të vitit të kaluar.
Në total, Shqipëria ka pritur 11,137,328 vizitorë të huaj në dhjetëmujorin e parë të vitit, ndërsa vetëm në tetor janë regjistruar 908,642 vizitorë. Ministri Bledi Gonxhe vlerësoi këtë ritëm si dëshmi të transformimit të turizmit nga sezonal në gjithëvjetor, duke e afirmuar vendin si një destinacion në zhvillim të qëndrueshëm dhe tërheqës gjatë gjithë vitit. /Skyweb.al
