Një studim i ri australian sugjeron se dëgjimi i rregullt i muzikës mund të ulë ndjeshëm rrezikun e demencës tek të moshuarit. Kërkimi, i cili analizoi të dhënat e mbi 10 mijë personave mbi moshën 70 vjeç, zbuloi se individët që dëgjonin shpesh muzikë kishin 39% më pak gjasa të zhvillonin demencë krahasuar me ata që muzikën e dëgjonin rrallë ose aspak.
Përfitimet e aktiviteteve muzikore shtrihen edhe në fusha të tjera të shëndetit mendor. Sipas studiuesve, dëgjimi i vazhdueshëm i muzikës lidhej me një ulje 17% të dëmtimit njohës, rezultate më të mira në testet kognitive dhe një kujtesë episodike më të fortë.
Efekt pozitiv u vu re edhe tek personat që luanin instrumente muzikore: kjo kategori kishte 35% më pak rrezik të zhvillimit të demencës. Ndërkohë, ata që kombinonin dëgjimin me luajtjen e muzikës përfitonin edhe më shumë, me 33% rrezik më të ulët për demencë dhe 22% më pak gjasa për dëmtim njohës.
Studiuesit theksojnë se këto të dhëna janë inkurajuese dhe tregojnë se aktivitetet muzikore mund të jenë një mënyrë e thjeshtë dhe e përballueshme për të mbrojtur shëndetin e trurit në moshë të thyer. Megjithatë, ata nënvizojnë se studimi është vëzhgues dhe nuk dëshmon drejtpërdrejt se muzika e redukton rrezikun, ndaj nevojiten kërkime të mëtejshme.
Ky zbulim vjen në një kohë kur numri i personave që jetojnë me demencë po rritet me ritme të shpejta në mbarë botën. Aktualisht, mbi 57 milionë njerëz vuajnë nga kjo gjendje, ndërsa çdo vit regjistrohen më shumë se 10 milionë raste të reja, ose një rast i ri çdo 3.2 sekonda. /Skyweb.al
