Një orë xhepi prej ari, e cila u gjet në trupin e një prej pasagjerëve më të pasur të Titanikut, është shitur për 1.78 milion paund në një ankand të mbajtur në Uajltshajër, një shumë që BBC e përshkroi si “rekord botëror”.
Ajo i përkiste Isidor Straus-it, bashkëpronarit të zinxhirit të njohur “Macy’s” në New York. Straus, së bashku me bashkëshorten e tij Ida, humbën jetën tragjikisht pas përplasjes së Titanikut me një ajsberg më 14 prill 1912.
Trupi i tij u gjet disa ditë pas katastrofës, dhe mes sendeve personale u gjet edhe ora prej 18 karatësh e prodhuesit “Jules Jurgensen”. Ajo kishte qëndruar në pronësi të familjes për më shumë se një shekull, derisa pasardhësit vendosën ta nxirrnin në ankand. Mekanizmi ishte ndalur në orën 02:20, koha kur Titaniku u zhyt në fund të Atlantikut.
Historia e Isidor dhe Ida Straus njihet gjerësisht për devotshmërinë e tyre të ndërsjellë. Natën e fundosjes, Ida raportohet se refuzoi të hipte në varkën e shpëtimit duke deklaruar se nuk do ta linte të shoqin vetëm. Trupi i saj nuk u gjet kurrë.
Në ankand u shit edhe një letër që Ida kishte shkruar gjatë udhëtimit me anijen, e cila arriti vlerën 100 mijë paund.
Objekte të tjera të rralla përfshinin listën origjinale të pasagjerëve, e blerë për 104 mijë paund, si dhe një medalje ari e dhënë ekuipazhit të anijes “Carpathia”, që shpëtoi mbi 700 të mbijetuar, kjo e fundit u shit për 86 mijë paund. Në total, ankandi i objekteve të lidhura me Titanikun arriti vlerën 3 milion paund.
Mendohet se ora i ishte dhuruar Isidorit nga Ida me rastin e 43-vjetorit të tyre në vitin 1888, dhe mbante të gdhendura inicialet e tij. Pasardhësit e ruajtën për breza, ndërsa stërnipi i tyre, Kenneth Hollister Straus, e riktheu në funksion falë një restaurimi profesional.
Vetëm një vit më parë, një orë e artë e dhuruar kapitenit të “Carpathia”-s ishte shitur për 1.56 milion paund, duke mbajtur rekordin e mëparshëm. Ora e Isidor Straus jo vetëm që e theu atë shifër, por u shpall edhe objekti më i shtrenjtë i lidhur ndonjëherë me Titanikun. /Skyweb.al
