Pavarësisht kaosit global, Rinas funksionoi normalisht: Vetëm dy-tre vonesa dhe një anulim i Pegasus, situata u menaxhua me sukses
Ndërsa qindra fluturime në mbarë botën u prekën sot nga vonesa dhe anulime pas urdhrit urgjent të Airbus për rikthim softueri në rreth 6 mijë avionë të familjes A320, situata në Aeroportin e Tiranës ka qenë kryesisht e qëndrueshme.
Nga një vëzhgim i bërë nga skyweb.al përmes platformës FlightRadar, në Rinas nuk pati probleme të theksuara, as në arritje dhe as në nisje, me përjashtim të dy fluturimeve, ku njëri i anulua dhe tjetri u shty per disa orë.
Fluturimi Tiranë–Londër, W95704 i Wizz Air, u vonua me më shumë se 3 orë në nisje, ndërsa në mëngjes u shënua edhe një anulim i Pegasus, në linjën Stamboll–Tiranë.
Përtej këtyre rasteve, pjesa tjetër e operimeve vijoi normalisht dhe aeroporti, së bashku me kompanitë ajrore, duket se e kanë menaxhuar situatën me sukses.
Ndërkohë, panorama ndërkombëtare ka qenë shumë më e rënduar.
Sipas Reuters, urdhri i Airbus për përditësim urgjent të softuerit ka ndërprerë operimet ajrore në qindra aeroporte, duke prekur fluturimet e linjave si American Airlines, Air France, Lufthansa, Avianca dhe kompani të tjera që operojnë me avionë të familjes A320, një nga modelet më të përdorura në botë.
Masa e menjëhershme erdhi pas incidentit të një muaji më parë, kur një avion i JetBlue pësoi rënie të papritur të lartësisë për shkak të një defekti në sistemet e kontrollit të fluturimit. Hetimet zbuluan se modeli A320 kërkon përditësime të detyrueshme, dhe në disa raste edhe ndërhyrje teknike shtesë.
Kjo ka sjellë anulime, riorganizime të orareve dhe vonesa të konsiderueshme në Europë, SHBA dhe Azi, ndërsa autoritetet e aviacionit janë vënë në gatishmëri për të mbikëqyrur procesin e rikthimit të softuerit dhe sigurinë e avionëve. /skyweb.al
