Airbus (AIR.PA) ka vendosur një objektiv të brendshëm për të dorëzuar mbi 900 avionë për herë të parë gjatë këtij viti, pasi dorëzoi 89 avionë në qershor. Megjithatë, kompania po e mban të pandryshuar objektivin e saj zyrtar për vitin, prej 870 dorëzimesh, sipas burimeve të industrisë.
Totali i qershorit tregon se Airbus ka dorëzuar 351 avionë gjatë gjysmës së parë të vitit 2026, një rritje prej 15% krahasuar me të njëjtën periudhë të vitit të kaluar. Kjo përbën performancën më të mirë të gjashtëmujorit të parë që nga viti 2019.
Sipas burimeve, kjo rritje pasqyron pjesërisht një shtim të përkohshëm të dorëzimeve, ndërsa Airbus vazhdon të kompensojë vonesat në dorëzimet për Kinën dhe përfiton nga zbutja e problemeve në furnizimin me motorë, shkruan Reuters.
Megjithatë, Airbus shihet gjithnjë e më i sigurt se mund të ruajë një ritëm të lartë të dorëzimeve edhe në gjysmën e dytë të vitit, pavarësisht vështirësive të vazhdueshme në zinxhirin e furnizimit. Burimet parashikojnë se kompania do të dorëzojë rreth 80 avionë në korrik. Tradicionalisht, dorëzimet përshpejtohen ndjeshëm gjatë muajit dhjetor.
Airbus nuk pranoi të komentojë mbi dorëzimet përpara publikimit të raportit mujor, i cili pritet të publikohet të mërkurën.
Javën e kaluar, Bloomberg raportoi se Airbus kishte dorëzuar rreth 90 avionë në qershor.
Dorëzimet e avionëve janë një faktor kyç për përcaktimin e të ardhurave dhe gjenerimit të fluksit të parasë (cash flow) për grupin e gjerë të industrisë së hapësirës ajrore dhe mbrojtjes.
