Nga qyteti bregdetar i Vlorës deri në fshatin jugor të Ksamilit, Riviera Shqiptare po përshkruhet gjithnjë e më shpesh si “Maldivet e Europës”. Me plazhe me rërë të bardhë dhe ujëra të kristalta të Jonit, ajo ofron një peizazh që rivalizon destinacionet më ekzotike të botës. Por Riviera nuk është vetëm det. Fshatra tradicionale në kodra me ullinj shekullorë, rrënoja antike dhe kujtime të së kaluarës komuniste krijojnë një përzierje unike kulture dhe historie.
Qasja drejt Rivierës është bërë më e lehtë se kurrë, falë rritjes së fluturimeve direkte nga Mbretëria e Bashkuar drejt Tiranës, që ndodhet vetëm dy orë larg me makinë nga Vlora. Udhëtimi përgjatë rrugës bregdetare SH8 është një aventurë vizuale, me detin Jon që shoqëron pamjen pothuajse gjatë gjithë rrugës.
Dita e parë: Histori dhe fshatra të fshehur në kodra
Rrugëtimi fillon në Vlorë, qyteti ku Shqipëria shpalli pavarësinë më 1912. Monumenti i Pavarësisë dhe Muzeu Kombëtar i Pavarësisë kujtojnë këtë moment kyç historik. Pas një vizite kulturore, ndalesa e parë kulinare është në Radhimë, ku peshku i freskët serviret në një ambient buzë detit.
Pasditeja vijon në Parkun Kombëtar të Llogarasë me një shëtitje në gjurmët e Jul Çezarit. Mbrëmja zbret në Porto Palermo, ku kalaja e Ali Pashë Tepelenës ruan hyrjen në një gjirin natyror spektakolar. Dita mbyllet në fshatin e vjetër Qeparo, ku tradita dhe mikpritja shqiptare përfaqësohen nga restoranti familjar “Ida & Xhorxhi”.
Dita e dytë: Ujëra të kthjellëta dhe thesare të fshehura
Pas mëngjesit tradicional me petulla dhe kafe turke, rruga vijon drejt plazhit të Bunecit. Ky është një vend ideal për relaks ose për aventura me kajak. Dreka shijohet në një tavernë bregdetare, përpara se të vizitoni Syrin e Kaltër, një burim natyror mahnitës që dikur ishte i rezervuar vetëm për elitën e regjimit komunist.
Mbrëmja zhvendoset pranë liqenit të Butrintit, ku mund të provoni midhjet vendase të përgatitura nga fermeri Soraldo Nebo, shoqëruar me verë shqiptare. Dita përmbyllet në plazhin privat të Kep Merlit në Ksamil, një parajsë e qetë larg turmave, ku numri i vizitorëve është i kufizuar.
Tre vende arkeologjike që s’duhen humbur
Orikumi
I fshehur pranë bregdetit të Vlorës, qyteti antik zbulohet pas rrënojave të epokës komuniste. Me portin e lashtë, teatrot grekë dhe gjurmët romake, ai është një vend që ndërlidh mijëvjeçarë historie.
Finiqi
Pranë Sarandës, ky qytet i lashtë i Epirit grek ofron jo vetëm rrënoja antike, por edhe një shëtitje mes natyrës me lule të egra dhe pamje të mahnitshme nga lartësitë.
Butrinti
Qyteti i lashtë, pjesë e trashëgimisë botërore të UNESCO-s, është një labirint kulturash. Nga grekët dhe romakët te bizantinët dhe venedikasit, ai përfaqëson një mozaik historik unik në Ballkan.
Riviera Shqiptare nuk është thjesht një destinacion veror. Ajo është një udhëtim në histori, në kulturë dhe në bukurinë natyrore të paprekur. /National Geographic
