Rriten rastet me HIV në Shqipëri. Vetëm gjatë vitit 2025 janë konfirmuar 125 persona HIV pozitiv, megjithëse mendohet se numri real i të infektuarve mund të jetë shumë më i lartë. Në Ditën Botërore kundër HIV-AIDS, specialistët e Institutit të Shëndetit Publik raportojnë se pjesën më të madhe të rasteve të reja e përbëjnë meshkujt, 97 raste, ndërsa femrat janë 28.
Transmetimi seksual mbetet rruga kryesore e përhapjes së HIV-it, ndërsa 23% e të infektuarve e kanë marrë virusin gjatë marrëdhënieve homoseksuale. Gjatë këtij viti, një foshnjë ka lindur HIV pozitiv për shkak të transmetimit nga nëna te fëmija. Ekspertët e Shëndetit Publik theksojnë se, pavarësisht protokolleve ekzistuese, vetëm 50% e grave shtatzëna testohen për HIV.
Rastet e reja janë kryesisht te grupmosha 25–44 vjeç. Në të gjithë vendin, nga viti 1993 deri më sot, ISHP ka regjistruar 1,973 raste me HIV.
HIV transmetohet përmes kontakteve seksuale, gjakut dhe qumështit të gjirit. Nuk paraqesin rrezik për infektim përqafimi, puthja apo shtrëngimi i duarve. Po ashtu, nuk transmetohet përmes ushqimit, ujit apo sendeve personale.
