Ministria e Financave ka dërguar në Kuvend projektligjin për miratimin e Marrëveshjes së Garancisë ndërmjet Republikës së Shqipërisë dhe Bankës Evropiane për Rindërtim dhe Zhvillim, që lidhet me marrëveshjen e huasë mes KESH dhe BERZH për financimin e Projektit Fotovoltaik Solar.
Ministri i Financave Petrit Malaj tha në seancë se projekti do të financohet përmes një huaje 30 milionë euro nga BERZH dhe një granti prej 9.58 milionë euro nga Instrumenti i Investimeve të Ballkanit Perëndimor, çka ul ndjeshëm koston totale dhe përmirëson qëndrueshmërinë financiare të investimit.
Shqipëria, e cila prodhon energjinë kryesisht nga burimet hidrike, ka nevojë emergjente për diversifikimin e burimeve për shkak të ndryshimeve klimatike dhe periudhave të gjata të thatësirës.
Sipas Malajt, politikat që nxisin investimet private në prodhimin e energjisë mbeten thelbësore.
Ai tha se aktualisht janë në operim rreth 600 MW kapacitete gjeneruese nga energjia diellore dhe rreth 400 MW të tjerë nga vetëprodhuesit. Kjo sjell të ardhura më të larta në ekonomi dhe ulje të kostove të konsumatorëve gjatë sezonit turistik, kur konsumi rritet ndjeshëm.
Ministri theksoi se projekti është i rëndësishëm për tranzicionin energjetik, pasi rrit sigurinë e furnizimit dhe ul varësinë nga prodhimi hidrik. Ndërtimi i impiantit fotovoltaik 50 MWp në Belsh konsiderohet hap strategjik drejt modernizimit dhe rritjes së kapaciteteve të energjisë së pastër, duke shfrytëzuar një zonë me potencial të lartë diellor.
Impianti ndodhet rreth 8 kilometra nga nënstacioni i Kajanit dhe do të mundësojë prodhimin e rreth 1 për qind të energjisë vjetore, ose 2 për qind të konsumit të tregut të rregulluar. Sipas Ministrisë së Financave, projekti rrit sigurinë e furnizimit, ul varësinë nga importi dhe përmirëson menaxhimin e rezervës hidrike të kaskadës së Drinit.
Mbështetja e BERZH dhe grantit WBIF e bën projektin më të qëndrueshëm dhe në linjë me objektivat kombëtare të Shqipërisë në energji. /skyweb.al
