Kryeministri Edi Rama, në hapje të episodit të 9-të të podkastit “Flasim”, riktheu në qendër të debatit çështjen e ankimimit në Gjykatën Kushtetuese për pezullimin nga detyra të ministres Belinda Balluku. Ai theksoi se kërkesa nuk ka karakter politik dhe nuk synon përplasjen me drejtësinë, por mbrojtjen e balancës mes pushteteve.
Rama theksoi se kufijtë kushtetues të ekzekutivit janë cenuar dhe se pezullimi i një anëtari të kabinetit krijon pasoja të drejtpërdrejta në funksionimin e institucioneve. Duke iu referuar rasteve të drejtorit të ARRSH-së dhe drejtorit të KESH-it, ai tha se vendosja e tyre në arrest shtëpie, pa një proces gjyqësor të përfunduar, i ka lënë dy institucione kyçe “pa kokë”, duke bllokuar funksionet normale të infrastrukturës rrugore dhe energjetike.
Sipas kryeministrit, pezullimi i një ministri e bën të pamundur çdo zëvendësim në varësi të tij, pasi ligji ia njeh vetëm ministrit kompetencën për emërimet, duke e quajtur këtë situatë “antidemokratike dhe alogjike”. Ai paralajmëroi se një precedent i tillë nuk ekziston në Europë dhe përbën rrezik të drejtpërdrejtë për funksionimin e shtetit.
Rama shtoi se ndërhyrja në ekzekutiv përmes masave të tilla është një alarm serioz dhe se kërkesa në Gjykatën Kushtetuese synon të garantojë që kjo situatë të mos përsëritet. Ai nënvizoi se qëndrimi i tij nuk është ndërhyrje në drejtësi, por mbrojtje e funksionimit institucional.
“Paraburgimet dhe arrestet e shtëpisë, pa gjyq, janë bërë ‘bukë e djathë’ në Shqipëri”, deklaroi Rama, duke iu referuar vërejtjeve të përsëritura nga Këshilli i Europës.
Në mbyllje, ai theksoi se rikthimi i pushteteve në pozicionet e tyre kushtetuese është i domosdoshëm për stabilitetin dhe modernizimin e shtetit. /skyweb.al
