Qeveria shqiptare krijoi kompaninë shtetërore, e cila do të përfaqësojë shtetin në ortakëri tek resorti i Jared Kushner në Sazan. Korporata e Investimeve Shqiptare regjistroi një ditë më parë në Qendrën Kombëtare të Biznesit shoqërinë aksionare Albanian State Develompent & Real Estate.
“Objekti i kësaj shoqërie do të jetë pjesëmarrja si përfaqësues i shtetit, në partneritete apo investime strategjike si dhe në çdo rast të përcaktuar me vendim të organeve të shoqërisë, lidhur me projektin e investimit “Resorti Turistik- Ishulli i Sazanit” apo çdo projekt tjetër të autorizuar nga Korporata e Investimeve” thuhet në ekstraktin e kompanisë së sapokrijuar.
Krijimi i shoqërisë që do të përfaqësojë palën shtetin në investimin 1.4 miliardë dollarë nga kompania e dhëndrit të Presidentit Donald Trump, sinjalizon se projekti po avancon. Komiteti i Investimeve Strategjike miratoi në fund të vitit të kaluar statusin e investitorit strategjik për këtë projekt, duke shpalosur në dokument edhe hapat që do të ndiqeshin për realizimin e tij.
Njëri prej ishte negocimi i marrëveshjes dhe kushteve me të cilat shteti do të hyjë në bashkëpjesmarrje në këtë investim si dhe krijimi i kompanisë përkatëse shtetërore.
“Forma e pjesëmarrjes së shtetit në këtë investim do të realizohet nëpëmjet krijimit të një entiteti juridik të përbashkët të përbërë nga Korporata e Investimeve Shqiptare (AIC), Albanian Seaports Development Company sh.a (ASDC), në cilësinë e palës shtet, dhe subjektit investues Atlantic Incubation Partners LLC, shoqëri e të drejtës amerikane,” thuhej në vendimin e Komitetit të Investimeve Strategjike.
Projekti, me një vlerë të parashikuar investimi prej 1.4 miliardë eurosh, synon ndërtimin e një marine turistike, rezidencash elitare, zone gastronomike dhe akomodimi në një sipërfaqe prej 45 hektarësh në 8 për qind të ishullit.
Projektet financohen nga kompania e investimeve e Kushner “Affinity Partners”, e cila mbështetet në fonde nga qeveria e Arabisë Saudite.
Krijimi i kompanisë shtetërore që do të hyjë ortake në resortin e Sazanit përkon me vizitën e Kushner në Shqipëri. Këto ditë, dhëndrri i presidentit të SHBA-ve së bashku më bashkëshorten e tij, Ivanka Trump, kanë qëndruar në Vlorë./kapitali
