Drejtimet më të kërkuara lidhen ngushtë me nevojat e ekonomisë, ku kryeson shërbimi i mjeteve të transportit me 865 regjistrime. Pas tij renditet Hoteleri-Turizmi me 763 regjistrime, një sektor që po gjeneron gjithnjë e më shumë vende pune.
Teknologjia e Informacionit dhe Komunikimit ka tërhequr 643 të rinj, duke reflektuar rritjen e kërkesës për profesionistë të fushës digjitale. Elektroteknika regjistroi 452 nxënës, ndërsa profilet termohidraulike dhe mekanike numërojnë 309 regjistrime.
Më herët, Skyweb.al raportoi se numri i nxënësve të regjistruar në shkollat e mesme profesionale është rritur me rreth 500 krahasuar me vitin e kaluar, duke përmbysur rënien e vazhdueshme të regjistrimeve.
Ekspertët e lidhin këtë ndryshim me realitetin e tregut të punës, ku shumë degë universitare prodhojnë të diplomuar pa perspektivë, ndërsa sektorë si ndërtimi dhe turizmi kanë mungesë fuqie punëtore.
Emigrimi masiv i profesionistëve si elektricistë dhe hidraulikë, por edhe kërkesa në rritje për punonjës të kualifikuar në shërbimet akomoduese, kanë ndikuar drejtpërdrejt në orientimin e të rinjve drejt arsimit profesional.
Të dhënat e INSTAT tregojnë se në vitin shkollor 2024-2025, në arsimin e mesëm të lartë janë regjistruar 89.190 nxënës, ndërkohë që në total, arsimi parauniversitar ka pësuar një rënie prej 2.6% krahasuar me vitin e kaluar.
Në arsimin e lartë janë regjistruar 122.613 studentë, një rritje e lehtë prej 2.1%, por programet “Bachelor” kanë rënë me 0.8%. Degët më të preferuara mbeten Biznesi, administrimi dhe ligji, ndjekur nga Shëndetësia dhe Inxhinieria.
Ky ndryshim i orientimit është një sinjal se tregu i punës po ndikon gjithnjë e më shumë në zgjedhjet arsimore, duke e bërë arsimin profesional një zgjedhje strategjike për të ardhmen./skyweb.al
