Administrata Federale e Aviacionit të SHBA (FAA) ka propozuar një gjobë prej 3.1 milionë dollarësh ndaj kompanisë ajrore Boeing, për shkelje serioze të sigurisë në prodhimin e avionëve, përfshirë incidente të lidhura me emergjencën në ajër të një avioni Alaska Airlines në janar 2024.
Sipas FAA-së, gjatë periudhës shtator 2023 – shkurt 2024 janë evidentuar qindra shkelje të sistemit të cilësisë në fabrikën e Boeing në Renton, Ëashington, si dhe në fabrikën e nënkontraktorit Spirit AeroSystems në Ëichita, Kansas.
Ndër shkeljet më serioze, FAA thekson se Boeing prezantoi dy avionë të pacertifikuar për siguri për t’u pajisur me certifikatën e ajrosjes, dhe se një punonjës i Boeing ushtronte presion mbi një tjetër që përfaqësonte FAA-në, që të miratonte një avion 737 MAX ndonëse ai nuk i plotësonte standardet.
Incidenti më i rëndë ndodhi në janar 2024, kur një derë emergjence në një avion të ri Alaska Airlines u shkëput gjatë fluturimit për shkak se mungonin të katër bulona, çka solli dëmtime serioze të reputacionit të kompanisë dhe ndalimin e përkohshëm të fluturimeve të modelit MAX 9 për dy javë. Që atëherë, FAA ka vendosur një kufizim prodhimi prej 38 avionësh në muaj, që mbetet ende në fuqi.
Boeing ka afat 30 ditë për t’iu përgjigjur penaliteteve të propozuara. Kompania ka deklaruar se po shqyrton vendimin dhe se është e përkushtuar të përmirësojë kulturën e sigurisë dhe cilësinë në të gjithë operacionet./Skyweb.al
