Prej 12 ditësh, ish-kryeministri Fatos Nano ndodhet i shtruar në spital për shkak të problemeve serioze shëndetësore. Burime për Skyweb.al bëjnë me dije se ish-kryeministri është prej disa ditësh në terapinë intensive, në gjendje të rëndë pas një arresti kardiorespirator.
Skyweb.al mëson se mjekët e konsiderojnë gjendjen e tij si “shumë të rëndë me prognozë të rënduar”, ndërsa vijon të mbahet nën kujdes të shtuar në reanimacionin e spitalit “Hygeia”.
Fatos Nano ka pasur prej kohësh probleme me mushkëritë dhe është shtruar disa herë në spital për trajtim mjekësor. Ai vuante nga sëmundja pulmonare obstruktive kronike (SPOK), një patologji që prek frymëmarrjen dhe kërkon trajtim të vazhdueshëm.
Nano, që drejtoi qeverinë shqiptare në disa periudha mes viteve 1991 dhe 2005, është themeluesi dhe kryetari i parë i Partisë Socialiste të Shqipërisë. Pas zgjedhjeve të vitit 2005, ai u tërhoq përfundimisht nga jeta politike, duke u distancuar nga zhvillimet partiake dhe publike./skyweb.al
