Kryeministri Edi Rama ka deklaruar se moti I keq ka qene jo vetëm në Shqipëri, por në të gjithë rajonin. Sipas tij, qeveria është e përgatitur dhe po i bën ballë përmbytjeve me sukses dhe premtoi dëmshpërblim për të prekurit nga moti i keq.

“Dua t’ju uroj të gjithëve, që viti 2026 të jetë viti më i mirë që keni pasur. Java ka qenë me reshje me borë. Përmbytje nuk ka pasur vetëm në Shqipëri, por në mbarë Ballkanin. Në Stamboll, situata ka qenë apokaliptike. Një masë e ftohtë nga arktiku është përplasur me një masë të butë nga Mesdheu, duke bërë që situata atmosferike të jetë problematike. Falë investimeve, ne jemi të përgatitur. Kemi bërë investime në strukturën e Emergjencave Civile, që kanë përherë e më shumë mjete. Jetojmë në një Shqipëri tjetër, sepse kjo vorbull do kishte shkaktuar më shumë përmbytje në kohë tjetër.

Edhe faktori njerëzor ka peshën e vet, për mirë apo për keq. Hedhja në kanale e mbetjeve është një skenë, që nuk do i pëlqente askujt. Hedhja e shisheve si bajga e bën me bajga edhe flamurin kombëtar, që duhet të jetë i pastër, në rrugën drejt BE-së. Mos ta përdhosim emrin shqiptar dhe Shqipërinë. Ne do të dalim edhe me masa më të forta. Hedhja e mbetjeve në rrugë është kriminale. Ekipet tona të verifikimeve janë në terren”, tha Rama.

Faktori njerëzor tha kryeministri ndikoi ndjeshëm në përmasat që mori situata pas reshjeve të dendura të shiut, duke paralajmëruar ndëshkim për këdo që hedh mbetjet në kanale e prita.

“Unë nuk e di fare sinqerisht se si i bëhet harbutërisë ekstreme ndaj natyrës që manifestojmë orë e çast ne si popull! Prurjet marramendëse të plastikës nga lumenjtë në këto raste, janë të frikshme, janë të neveritshme, janë kriminale. Do të dalim më tej me masa të reja kundër kësaj fuqie të errësirës në trurin tonë si milet, duke rritur përpjekjet për sensibilizim, informim, por edhe ndëshkim po ashtu”, tha Rama. /skyweb.al