Gjatë 24 orëve të ardhshme pritet përkeqësim i kushteve atmosferike, me reshje intensive shiu në veri dhe jug të vendit. Sipas Institutit të Gjeoshkencave (IGJEO), mbrëmjen e së shtunës dhe gjatë gjithë ditës së diel, qarku i Shkodrës do të përfshihet nga reshje lokalisht të dendura, ndërsa në qarqet Kukës dhe Vlorë parashikohen reshje me intensitet mesatar, të shoqëruara me shtrëngata. Në pjesën tjetër të vendit, reshjet do të jenë të dobëta.
Në zonat veriore, mbi 900 metra mbi nivelin e detit, reshjet do të bien në formë dëbore. IGJEO paralajmëron se shtrëngatat dhe intensiteti i lartë i reshjeve mund të shkaktojnë probleme, si rrëshqitje gurësh dhe inertesh, si edhe vërshime të ujit në zona urbane të caktuara, veçanërisht në qarkun Shkodër, në varësi të kapaciteteve të kanalizimeve.
Situata do të ndërlikohet edhe nga era, e cila nga pasditja e së shtunës dhe gjatë ditës së diel pritet të fryjë mesatare deri e fortë, kryesisht në zonat bregdetare dhe malore.
Ndërkohë, temperaturat maksimale të ajrit do të shënojnë rritje me rreth 5 gradë Celsius. Të dielën, temperaturat do të jenë pozitive në të gjithë territorin e vendit. Në zonat malore, temperaturat minimale do të zbresin deri në 2 gradë Celsius, ndërsa maksimalet do të arrijnë deri në 12 gradë. Në zonat e ulëta dhe bregdetare, temperaturat do të luhaten nga 9 deri në 19 gradë Celsius.
