Qeveria ka konfirmuar vendosmërinë për të vijuar me projektin e rijetëzimit të zemrës historike të Durrësit, i njohur si projekti TID, pavarësisht protestave të banorëve të prekur. Kryeministri Edi Rama deklaroi se projekti nuk është një nismë e re, por pjesë e një strategjie të kahershme për zhvillimin e zonës.
Sipas tij, ndërhyrja është e lidhur drejtpërdrejt me detyrimet që rrjedhin nga ligji për trashëgiminë kulturore, i cili e obligon shtetin të veprojë për të parandaluar degradimin dhe ndërhyrjet informale në zonat me vlera historike. Rama theksoi se procesi do të përfshijë edhe shpronësime të banorëve që jetojnë në zonën e projektit.
Kryeministri e cilësoi projektin si strategjik për të ardhmen e Durrësit dhe për pozicionimin e Shqipërisë si destinacion i rëndësishëm turistik në Mesdhe. Ai nënvizoi se Zona Arkeologjike A nuk mund të trajtohet si një hapësirë e zakonshme urbane, pasi përfaqëson një pasuri kombëtare dhe pjesë të trashëgimisë botërore.
Në këtë zonë përfshihen monumente të rëndësishme si Amfiteatri Romak, Forumi Bizantin dhe Termat Romake, të cilat sipas Ramës janë pjesë e qytetërimit europian dhe njëkohësisht element kyç për synimin që zona të përfshihet në listën e Trashëgimisë Botërore të UNESCO-s.
Sipas tij, projekti është mbështetur në një plan të integruar menaxhimi të hartuar nga Ministria e Kulturës dhe të konsultuar publikisht që në vitin 2022, duke e vendosur ndërhyrjen në një kuadër afatgjatë planifikimi.
Rama theksoi se përvoja ndërkombëtare tregon se projekte të ngjashme për ruajtjen dhe ekspozimin e trashëgimisë janë realizuar gjithmonë përmes shpronësimeve, duke përmendur raste në Romë dhe Athinë. Ai shtoi se procesi në Durrës do të realizohet me ndjeshmëri ndaj banorëve, por me vendosmëri për interesin publik. /skyweb.al
