Në një mbrëmje të veçantë kulturore në Berlin, Kryeministri Edi Rama prezantoi 13 vizatime të tij në ambientet e Ambasadës së Italisë. Aktiviteti u zhvillua në kuadër të ekspozitës së tij personale “Chrysalizing”, që po mbahet në Société Gallery.
Ekspozita përfshin jo vetëm vizatime, por edhe skulptura të realizuara nga Rama, i cili prej kohësh është aktiv në art krahas angazhimit politik.
Gjatë eventit, ambasadori italian në Berlin, Fabrizio Bucci, zhvilloi një bisedë të hapur me kryeministrin. Intervista kishte një karakter joformal, duke ndërthurur tema nga arti, përvojat personale dhe politika.
Në një prononcim për ANSA, Rama kujtoi me humor të kaluarën e tij si artist dhe sportist, duke thënë: “Jam artisti më i mirë në botë mes kryeministrave dhe kryeministri më i mirë mes artistëve”.
Duke kaluar te çështjet politike, ai u ndal te rëndësia e Bashkimi Evropian, të cilin e përshkroi si thelbësor për ndërtimin institucional të vendeve aspirante. Sipas tij, procesi i integrimit është kompleks, por efektiv.
Rama theksoi gjithashtu se pas pushtimit të Ukrainës nga Rusia, Bashkimi Evropian ka ndryshuar qasje, duke reflektuar më shumë në veprime konkrete. Ai shtoi se më parë kishte më shumë deklarata sesa rezultate, ndërsa tani është kuptuar rreziku i humbjes së vendeve jashtë unionit.
Megjithatë, ai kritikoi ritmin e ngadaltë të integrimit evropian, duke kërkuar më shumë dinamizëm dhe më pak burokraci në këtë proces.
Gjatë bisedës, Rama rikujtoi edhe periudhën e tij si pedagog në Akademinë e Arteve në Tiranë dhe më pas si kryebashkiak, duke folur për transformimet urbane dhe shoqërore që ka përjetuar Shqipëria.
Sipas tij, vendi ka evoluar nga një shoqëri e përqendruar kryesisht te mbijetesa, drejt një realiteti ku ka më shumë vëmendje për hapësirat publike dhe zhvillimin institucional.
Ngjarja u organizua në bashkëpunim me Société Gallery, në kuadër të Gallery Weekend Berlin. Ambasada italiane mbështeti gjithashtu pjesëmarrjen e një bande marshuese nga Olevano Romano, e lidhur me një vepër të artistes gjermane Annika Kahrs, e ekspozuar në Hamburger Bahnhof.
