Bashkimi Europian ka sqaruar se kompanitë ajrore mund të përdorin karburantin Jet A, standard amerikan, në vend të Jet A-1, për sa kohë që procesi kryhet në mënyrë të kontrolluar dhe të gjurmueshme në të gjithë zinxhirin e furnizimit.
Ky vendim nuk përbën një ndryshim të detyruar të standardit të karburantit, por një sqarim rregullator që synon të shmangë pengesat operative në një moment kur tregu i karburantit për aviacionin po përballet me presione të forta.
Konteksti lidhet drejtpërdrejt me zhvillimet gjeopolitike dhe rritjen e ndjeshme të çmimeve të karburantit. Që nga fillimi i konfliktit në Lindjen e Mesme, çmimi i jet fuel është rritur me rreth 84%, ndërsa Europa importon rreth 75% të karburantit të saj për aviacionin, kryesisht nga kjo zonë.
Jet A-1 mbetet standardi kryesor në Europë, por mundësia për të përdorur Jet A shihet si një “valvul sigurie” për të diversifikuar furnizimin në rast të kufizimeve të mëtejshme në treg.
Dallimet mes dy llojeve të karburantit janë teknike, por të rëndësishme. Jet A-1 ka një pikë ngrirjeje më të ulët, çka e bën më të përshtatshëm për fluturime në distanca të gjata dhe në lartësi të mëdha.
Për këtë arsye, Agjencia Europiane e Sigurisë së Aviacionit ka theksuar se përdorimi i Jet A është i mundur, por kërkon përshtatje të procedurave nga kompanitë ajrore, aeroportet dhe operatorët në tokë, si dhe koordinim të plotë në të gjithë zinxhirin.
Një tjetër element i rëndësishëm lidhet me të drejtat e pasagjerëve. Komisioni Europian ka bërë të qartë se rritja e çmimit të karburantit, në vetvete, nuk justifikon shmangien e detyrimeve për kompensim në rast anulimesh fluturimesh.
Vetëm mungesat reale dhe të dokumentuara të karburantit mund të konsiderohen si rrethana të veçanta, dhe çdo rast do të vlerësohet individualisht.
Ky sqarim vjen në një moment kritik për sektorin e aviacionit, ku çdo vonesë në furnizim apo logjistikë mund të shkaktojë zinxhir anulimesh dhe riorganizimesh fluturimesh. Në këtë kuptim, vendimi i Brukselit synon të shmangë bllokimet operative dhe të mbajë stabilitetin në një treg gjithnjë e më të tensionuar.
