Një kullë me 14 kate pritet të ndërtohet në zonën e Gjirit të Lalzit, duke u bërë ndërtesa më e lartë në këtë zonë, ku deri më tani zhvillimet kanë qenë të kufizuara në komplekse dhe fshatra turistikë me lartësi deri në 4 kate.
Me këtë projekt, zona rrezikon të ndryshojë rrënjësisht karakterin e saj, duke iu afruar modelit të Golemit, ku ndërtimet e dendura dhe në lartësi kanë dominuar vitet e fundit.
Deri më tani, Gjiri i Lalzit është zhvilluar me ndërtime të ulëta dhe të shtrira, në përpjekje për të ruajtur një raport më të balancuar me natyrën.
Së fundmi, sipas Voxnews.al, Agjencia e Zhvillimit të Territorit ka zbardhur një leje ndërtimi të miratuar me kusht për një objekt të përshkruar si “kompleks hotelerie 1, 3, 13 dhe 14 kate mbi tokë, rezidencë dhe shërbime 1-3 kate mbi tokë, me tarraca të shfrytëzueshme dhe mur rrethues”. Projekti do të zhvillohet në territorin e Bashkisë Durrës dhe subjekti zhvillues është shoqëria “Bpi Blessed Property Invest”.
Leja do të bëhet përfundimtare vetëm pasi kompania të plotësojë dokumentacionin tekniko-ligjor dhe të kryejë pagesën e taksës së ndikimit në infrastrukturë në favor të Bashkisë së Durrësit.
Sipas dokumentacionit shoqërues, parcela ku parashikohet ndërtimi ndodhet në një zonë me karakter agrikulturor dhe ka një sipërfaqe totale prej 7,333 metrash katrorë. Në këtë truall nuk ekziston asnjë strukturë aktuale, ndërsa projekti parashikon ndërtimin e një resorti me funksione hotelerie, apartamente dhe shërbime turistike.
Të dhënat nga Qendra Kombëtare e Biznesit tregojnë se pronar i shoqërisë zhvilluese është Erald Mata, 36 vjeç nga Dibra, ndërsa administrator është Agim Isaku, gjithashtu nga Dibra. Një element që bie në sy është kapitali i deklaruar i kompanisë, i cili rezulton të jetë vetëm 100 mijë lekë.
Sipas të dhënave, këta individë kanë qenë më herët të lidhur me një aktivitet bar-restorant në zonën e Gjirit të Lalzit, ndërsa subjektet e mëparshme rezultojnë të jenë çregjistruar dhe pezulluar.
Projekti i publikuar tregon një kullë të lartë në hyrje të kompleksit, e ndjekur nga struktura rezidenciale të vendosura pranë njëra-tjetrës. Ndërtimi i kësaj kulle pritet të shënojë një kthesë në zhvillimin urban të zonës, duke vënë në pikëpyetje modelin aktual të ndërtimeve të ulëta dhe në harmoni me mjedisin.
Me ritmet aktuale të zhvillimit, ekspertët paralajmërojnë se zona e Gjirit të Lalzit mund të ndjekë të njëjtin trajektore si Golemi, Mali i Robit apo Qerreti, ku ndërtimet intensive kanë ndryshuar ndjeshëm profilin urban dhe turistik.
