Kompania kineze e shitjeve online Temu është gjobitur me 200 milionë euro pasi nuk ka bërë mjaftueshëm për të ndaluar shitjen e produkteve ilegale, njoftuan të enjten rregullatorët e teknologjisë të Bashkimit Europian, pas fazës së parë të një hetimi të gjerë, raporton Reuters.
Penalitete të tjera mund të pasojnë në muajt e ardhshëm si rezultat i një hetimi që ka zgjatur pothuajse dy vite në kuadër të Aktit të Shërbimeve Digjitale (DSA), i cili kërkon që kompanitë e mëdha online të bëjnë më shumë për të luftuar përmbajtjet dhe produktet ilegale apo të dëmshme në platformat e tyre. Rregullatorët europianë nisën hetimet ndaj Temu pas ankesave nga organizata paneuropiane e konsumatorëve BEUC dhe 17 anëtarët e saj kombëtarë.
Komisioni Europian, organi ekzekutiv i BE-së, deklaroi se kompania dështoi të identifikojë, analizojë dhe vlerësojë me kujdes rreziqet sistemike që lidhen me produktet ilegale të shitura në platformën e saj, si dhe dëmin që ato mund t’u shkaktojnë konsumatorëve në Bashkimin Europian.
Komisioni kritikoi gjithashtu Temu për mungesë të vlerësimit të duhur mbi mënyrën se si sistemet e rekomandimeve dhe programet promocionale të produkteve nga influencerë të lidhur me platformën mund të rrisin rrezikun e shitjes së produkteve ilegale.
“Temu respekton objektivat e Aktit të Shërbimeve Digjitale dhe nevojën për rregulla të qarta dhe të qëndrueshme në ekonominë digjitale. Megjithatë, nuk pajtohemi me vendimin e Komisionit Europian dhe e konsiderojmë gjobën joproporcionale,” tha kompania në një deklaratë.
“Vendimi lidhet me vlerësimin tonë të parë sipas DSA në vitin 2024 dhe nuk pasqyron gjendjen aktuale të sistemeve tona. Temu ka bashkëpunuar në mënyrë konstruktive me Komisionin gjatë gjithë procesit dhe që atëherë ka ndërmarrë hapa shtesë për të forcuar vlerësimin e rreziqeve, qeverisjen e platformës dhe mbrojtjen e përdoruesve,” shtoi kompania, duke theksuar gjithashtu se po shqyrton të gjitha opsionet e mundshme lidhur me këtë çështje.
Komisioni Europian i ka dhënë Temu afat deri më 28 gusht për të paraqitur një plan veprimi, i cili do të vlerësohet nga rregullatorët. Vendimi nëse kompania ka bërë mjaftueshëm për t’u përputhur me DSA pritet brenda dy muajve të ardhshëm.
“Kjo ka të bëjë me menaxhimin e rrezikut. Është një nga shtyllat kryesore të DSA,” deklaroi për gazetarët shefja e teknologjisë në BE, Henna Virkkunen. “Me këtë vendim po i dërgojmë një mesazh shumë të fortë Temu.”
Ajo shtoi se rregullatorët do të vazhdojnë hetimet për të përcaktuar nëse dizajni i shërbimit të Temu krijon varësi te përdoruesit, si dhe nëse platforma vazhdon të shesë produkte ilegale apo kufizon aksesin e studiuesve në të dhëna.
Kompanitë mund të përballen me gjoba deri në 6% të xhiros së tyre globale vjetore për shkelje të DSA.
Gjobitja e Temu është e dyta e vendosur sipas DSA, pas rrjetit social X të Elon Musk, i cili u gjobit me 120 milionë euro në dhjetor të vitit të kaluar. /skyweb.al
