Një avion Boeing 737 i Ryanair u detyrua të kthehej me urgjencë në Selanik, pasi motori i djathtë pësoi një dëmtim të rëndë gjatë fluturimit.
Bëhet fjalë për motorin nr. 2, të tipit CFM56, i cili pësoi atë që në aviacion njihet si “uncontained failure”.
Ky është një nga defektet më serioze të motorit, pasi dëmtimi nuk mbetet brenda mbështjellëses mbrojtëse të tij.
Në raste të tilla, pjesë metalike të motorit mund të shkëputen me forcë dhe të godasin strukturën e avionit.
Pikërisht këto fragmente dyshohet se kanë dëmtuar avionin dhe kanë thyer xhamin e kabinës.
Pas defektit, ekuipazhi shpalli menjëherë emergjencën dhe vendosi kthimin drejt aeroportit të Selanikut.
Avioni arriti të ulej i sigurt, ndërsa incidenti tashmë po hetohet për të përcaktuar shkakun e dëmtimit të motorit.
Hetimi do të verifikojë nëse defekti lidhet me lodhje të materialit, dëmtim të brendshëm të motorit, mirëmbajtje apo ndonjë shkak tjetër teknik.
NTSB, autoriteti amerikan i sigurisë së transportit, ka caktuar një përfaqësues të akredituar për të asistuar hetimin.
Raste të tilla konsiderohen serioze në aviacion, sepse fragmentet e motorit mund të dëmtojnë trupin e avionit, krahët, sistemet hidraulike apo kabinën.
Megjithatë, reagimi i shpejtë i pilotëve dhe kthimi në Selanik shmangën pasoja më të rënda.
