Presidenti i Republikës, Bajram Begaj, ka reaguar për situatën e zjarreve që kanë përfshirë disa zona të vendit, duke kërkuar ndëshkim të ashpër për personat që shkaktojnë qëllimisht vatra zjarri.
Përmes një postimi në Facebook, Begaj vlerësoi punën dhe sakrificën e zjarrfikësve, efektivëve të Forcave të Armatosura dhe të gjithë strukturave të angazhuara në luftën me flakët.
“Me guxim, përkushtim dhe sakrificë, ata po mbrojnë jetën, familjet, banesat dhe pasuritë tona”, shkruan Presidenti, duke shprehur respekt për efektivët që po përballen me rrezikun në vijën e parë.
Kreu i Shtetit përcolli një mesazh të fortë edhe ndaj autorëve të zjarrvënieve, duke kërkuar që ndaj tyre të veprojë ligji.
“Keqbërësit që i vënë flakën vendit duhet të ndëshkohen ashpër dhe sipas ligjit”, deklaroi Begaj.
Presidenti u bëri apel edhe qytetarëve që, në kushtet e temperaturave të larta dhe rrezikut të shtuar nga zjarret, të tregojnë kujdes dhe përgjegjësi.
Ai kërkoi respektimin e udhëzimeve të autoriteteve, shmangien e veprimeve që mund të rrezikojnë jetën dhe kontributin e secilit për mbrojtjen e komunitetit, pronës dhe natyrës.
“Sot, Shqipëria ka nevojë për solidaritetin dhe përgjegjësinë e të gjithëve”, përfundoi Presidenti.
