Një fluturim i kompanisë Porter Airlines në Kanada u detyrua të kthehej në terminal, pasi një fëmijë i vogël refuzoi të vendoste rripin e sigurimit.
Ngjarja ndodhi më 6 gusht, në një fluturim nga Victoria drejt Torontos. Sipas kompanisë ajrore, fëmija qëndronte në këmbë mbi sedilje dhe nuk pranonte të ulej e të vendoste rripin, pavarësisht përpjekjeve të prindit dhe ekuipazhit.
Porter Airlines sqaroi se avioni nuk mund të ngrihej në kushte të tilla, pasi rregullat e sigurisë kërkojnë që pasagjerët të jenë të ulur dhe të lidhur gjatë fazave kritike të fluturimit.
Ekuipazhi vendosi përfundimisht të rikthejë avionin në terminal dhe të zbresë fëmijën së bashku me prindin shoqërues.
Vonesa e krijuar bëri që pista të mbyllej pas mesnate dhe fluturimi të mos realizohej, ndërsa pasagjerët u transferuan në një udhëtim të planifikuar për ditën pasardhëse.
Ekspertja e sigurisë së fëmijëve në aviacion, Lia Tuso, tha për BBC se vendimi i ekuipazhit ishte i domosdoshëm, pasi një fëmijë i palidhur mund të pësojë dëmtime serioze gjatë turbulencave ose të përplaset me pasagjerë të tjerë.
Incidenti ka ndezur debat në internet mbi mënyrën se si duhet të trajtohen raste të tilla në avionë.
Një pjesë e komentuesve kanë kritikuar prindërit për mungesë disipline, ndërsa të tjerë argumentojnë se fëmijët mund të reagojnë nga frika ose ankthi gjatë fluturimit dhe se situata të tilla kërkojnë më shumë mirëkuptim.
