Autoriteti Kombëtar i Ushqimit ka ushtruar kontroll në ambientet e Premium Beach Hotel në Golem, pas ankesës së një grupi turistësh të huaj që shfaqën shenja helmimi. Ngjarja ka ndodhur disa ditë më parë, pasi turistët kishin konsumuar ushqim në restorantin e hotelit.
Burime të Skyweb.al bëjnë të ditur se turistët janë ndier keq dhe kanë marrë ndihmën e parë, ndërsa më pas u është konfirmuar se simptomat lidheshin me helmim ushqimor.
Pas këtij konstatimi, ata i janë drejtuar Autoritetit Kombëtar të Ushqimit përmes një ankese të dërguar në adresën zyrtare info@aku.gov.al.
Skyweb.al është njohur me ekzistencën dhe përmbajtjen e këtij komunikimi pak ditë pas paraqitjes së ankesës.
Menjëherë pas denoncimit, AKU ka dërguar një grup inspektimi në Premium Hotel, së bashku me përfaqësues të Inspektoratit Shtetëror Shëndetësor. Gjatë kontrollit janë marrë mostra nga produktet ushqimore të përdorura në restorantin e hotelit, të cilat janë dërguar për analiza laboratorike.
Skyweb.al ka parë edhe procesverbalin e mbajtur nga inspektorët gjatë kontrollit.
Paraprakisht, inspektorët dyshojnë se helmimi mund të jetë shkaktuar nga prania e një bakteri në djathin e konsumuar nga turistët. Ndërkohë, burime pranë AKU-së sqarojnë se rezultatet përfundimtare të analizave laboratorike nuk kanë dalë ende.
REAGIMI I KOMPANISË
Ndërkohë, në një reagim për redaksinë, kompania Premier Group, e cila zotëron Premium Beach Resort, ka vënë në dispozicion një përgjigje zyrtare të Inspektoratit Shtetëror Shëndetësor lidhur me denoncimin për rastin e dyshuar të helmimit.
Sipas Inspektoratit, gjatë kontrollit u konstatua se subjekti furnizohej me ujë higjienikisht të pastër, bazuar në raport-analizën e ujit nr. 65, të datës 4 maj 2026.
Premier Group dispononte gjithashtu akt-miratimin higjieno-sanitar nr. 1498, të datës 22 korrik 2016.
Sipas dokumentacionit të paraqitur, shërbimi i dezinfektimit, dezinsektimit dhe deratizimit ishte kryer nga kompania “Bioned” më 5 maj 2026.
Inspektorët kanë konstatuar gjithashtu se personeli ishte i pajisur me libreza shëndetësore dhe se produktet ushqimore ruheshin në kushte të përshtatshme higjieno-sanitare.
“Nga kontrolli dhe verifikimi i dokumentacionit dhe kushteve higjieno-sanitare të subjektit, nuk u konstatuan shkelje të kërkesave ligjore dhe higjieno-sanitare në momentin e inspektimit”, thuhet në përgjigjen e ISHSH-së. /skyweb.al
