Ryanair po shqyrton mundësinë të anulojë një nga porositë më të mëdha në historinë e saj, atë prej 30 miliardë dollarësh për avionët Boeing 737 MAX, nëse tarifat e reja të propozuara nga Shtetet e Bashkuara rrisin ndjeshëm koston e avionëve.
Shefi ekzekutiv i kompanisë, Michael O’Leary, bëri paralajmërimin në një kohë tensionesh tregtare në rritje mes Uashingtonit dhe Brukselit. “Çmimet tona nuk përfshijnë asnjë tarifë,” tha O’Leary, duke shtuar se Ryanair mund të kërkojë alternativa nëse kostot rriten.
Aktualisht, Ryanair ka të porositur 330 avionë nga Boeing, përfshirë 29 që priten të dorëzohen deri në mars 2026 dhe 150 të tjerë të modelit MAX 10 që do të vijnë nga viti 2027.
Një alternativë e mundshme është prodhuesi kinez COMAC, me modelin C919. Edhe pse Ryanair nuk ka zhvilluar bisedime me COMAC që prej vitit 2011, O’Leary tha se mund të konsiderojë këtë opsion nëse çmimi i ofruar do të jetë 10–20% më i ulët sesa ai i Airbus. Megjithatë, C919, me kapacitet 150–190 pasagjerë, do të ishte më i vogël se MAX 10 që Ryanair ka planifikuar të marrë.
Ryanair aktualisht operon 324 avionë Boeing dhe një kalim te një prodhues tjetër, sidomos te një prodhues kinez, do të përbënte një tronditje të madhe për dominimin e Boeing dhe Airbus në tregun europian të aviacionit. skyweb.al
