Bashkimi Europian ka vendosur të pezullojë pa afat fondet për axhendën dixhitale të Shqipërisë, pas shpërthimit të aferës së korrupsionit në Agjencinë Kombëtare të Shoqërisë së Informacionit.
Sipas Kapitali vendimi është marrë nga Komisioni Europian dhe i është komunikuar zyrtarisht qeverisë shqiptare, me argumentin e mbrojtjes së interesit të taksapaguesve europianë.
Pezullimi i financimeve vjen vetëm pak kohë pas ndërprerjes së fondeve për sektorin e bujqësisë, duke shënuar rastin e dytë radhazi kur Brukseli ngrin mbështetjen financiare për Shqipërinë për shkak të dyshimeve serioze për korrupsion dhe keqmenaxhim të fondeve publike.
Sektori dixhital në Shqipëri financohet nga Bashkimi Europian përmes disa instrumenteve. Vetëm gjatë verës së kaluar, qeveria shqiptare miratoi marrëveshjen e financimit me Komisionin Europian për programin shumëvjeçar “Ekonomia dhe shoqëria dixhitale” për periudhën 2024–2027, në kuadër të Instrumentit të Asistencës së Paraanëtarësimit.
Ky program ka një buxhet total prej 44 milionë eurosh, nga të cilat 30 milionë euro janë grant i Bashkimit Europian. Të gjitha këto fonde janë tashmë të ngrira.
Një tjetër projekt i rëndësishëm i prekur nga ky vendim është ai i pajisjes së 600 shkollave në vend me laboratorë smart, i financuar përmes Kuadrit të Investimeve për Ballkanin Perëndimor. Projekti ka një vlerë totale prej 44.3 milionë eurosh, ku 14 milionë euro sigurohen nga grantet e BE-së, fonde që aktualisht nuk do të disbursohen.
Financimet për axhendën dixhitale janë pjesë edhe e Planit të Rritjes për Ballkanin Perëndimor, përmes të cilit Bashkimi Europian ka angazhuar deri në 6 miliardë euro për rajonin. Për këtë arsye, ende nuk ka një shifër të saktë mbi totalin e fondeve që mund të preken nga ky pezullim për Shqipërinë.
Megjithatë, sinjali politik nga Brukseli është i qartë. Korrupsioni dhe abuzimi me fondet publike po kthehen në faktorë penalizues konkretë për vendin, duke rrezikuar jo vetëm projektet aktuale, por edhe besueshmërinë e Shqipërisë përballë institucioneve europiane./skyweb.al
