Të flesh me televizorin ndezur apo me dritë gjumi mund të duket e padëmshme, por një studim i ri paralajmëron se ekspozimi ndaj dritës gjatë natës mund të rrisë ndjeshëm rrezikun e sëmundjeve të zemrës dhe madje të vdekjes.
Studiues nga SHBA dhe Australia kanë ndjekur për gati 10 vite rreth 90 mijë persona në Britani, duke analizuar ekspozimin e tyre ndaj dritës gjatë gjumit përmes sensorëve të vendosur në kyçin e dorës. Rezultatet, të publikuara në revistën JAMA Netëork Open, tregojnë se personat që flinin me më shumë dritë gjatë natës kishin rrezik më të lartë për pesë sëmundje kardiovaskulare kryesore.
Sipas studimit, personat me ekspozimin më të lartë ndaj dritës gjatë natës:
kishin 56% më shumë rrezik për insuficiencë kardiake,
47% më shumë gjasa për infarkt,
32% më shumë rrezik për sëmundje koronare,
dhe 30% më shumë rrezik për goditje në tru.
Efekti u vu re pavarësisht cilësisë apo kohëzgjatjes së gjumit. Gratë u zbuluan se kishin rrezik më të lartë për sëmundje koronare krahasuar me burrat, kur flinin me dritë gjatë natës.
Shkencëtarët shpjegojnë se drita prish ritmin cirkadian, orën biologjike të trupit, duke çuar në çrregullime afatgjata fiziologjike që mund të dëmtojnë zemrën. Profesori Frank Scheer nga Spitali Brigham and Ëomen’s në Boston thekson se shmangia e dritës gjatë natës është një mënyrë e thjeshtë dhe pa pasoja për të ulur rrezikun.
Ekspertët rekomandojnë që drita gjatë natës të mbahet shumë e zbehtë, nën 5 luks, e barabartë me dritën e disa qirinjve, e mjaftueshme për siguri, por pa ndikuar në orën biologjike.
Studimi vjen në një kohë kur problemet me gjumin janë shumë të përhapura. Sipas të dhënave, rreth një në gjashtë britanikë vuan nga pagjumësia, ndërsa shumica nuk kërkon ndihmë mjekësore. Specialistët paralajmërojnë se mungesa kronike e gjumit lidhet me rrezik më të lartë për obezitet, diabet dhe sëmundje të zemrës. /skyweb.al
