Korporata e Investimeve Shqiptare ka shpallur për herë të pestë thirrjen për përzgjedhjen e një investitori privat për projektin “LIFT Tower”, pas dështimit të katër procedurave të mëparshme për shkak të mungesës së ofertave të vlefshme dhe interesit real nga biznesi.
Sipas Korporatës, bëhet fjalë për një nga projektet më ambicioze të zhvillimit urban në Tiranë, i planifikuar në truallin e Kadastrës, pranë rrugës “Muhamet Gjollesha”, me një sipërfaqe prej mbi 2,300 metra katrorë.
Projekti parashikon ndërtimin e një kulle shumëfunksionale me 40 kate mbi tokë dhe 7 kate nëntokë, që do të përfshijë zyra, ambiente tregtare, parkime, hoteleri, rezidenca studentore dhe hapësira banimi.
Në thelb të skemës që propozon Korporata Shqiptare e Investimeve qëndron partneriteti me sektorin privat, ku shteti ofron truallin, ndërsa investitori financon ndërtimin.
Në këmbim, privatit i kërkohet që mbi 45 për qind të sipërfaqes totale të ndërtimit t’ia kalojë shtetit, i cili synon të përfitojë rreth 34 mijë metra katrorë ambiente moderne për institucionet publike, pa kontribuar financiarisht në investim.
Megjithatë, katër përpjekjet e mëparshme kanë treguar se kjo formulë nuk po rezulton tërheqëse për tregun. Në thirrjen e parë, të shpallur në nëntor 2024, dy kompani u kualifikuan për fazën e dytë, por asnjëra nuk dorëzoi ofertë konkrete, duke çuar në anulimin e procedurës.
Edhe thirrja e dytë dështoi, pasi aplikimi i paraqitur u shpall i pavlefshëm për shkak të problemeve në dokumentacion. Tentativa e tretë, e cila u mbyll në maj 2025, nuk prodhoi asnjë fitues, ndërsa thirrja e katërt u mbyll sërish pa rezultat.
Përsëritja e dështimeve ka hapur pikëpyetje serioze mbi fizibilitetin real të projektit. Nga njëra anë, bëhet fjalë për një investim që llogaritet në dhjetëra milionë euro, me kosto të larta ndërtimi, financimi dhe risku tregu.
Nga ana tjetër, kërkesa që shteti të përfitojë një pjesë kaq të madhe të sipërfaqes së ndërtimit kufizon ndjeshëm potencialin e kthimit të investimit për privatët, sidomos në një treg që po shfaq shenja ngopjeje me kulla dhe projekte të mëdha imobiliare.
Në këtë kontekst, thirrja e pestë shihet më shumë si një përpjekje për të testuar edhe një herë interesin e tregut, sesa si një proces që garanton rezultat.
Pyetja kryesore mbetet nëse problemi qëndron te kushtet financiare dhe ndarja e përfitimeve, apo nëse cikli i zhvillimit të kullave në Tiranë po hyn gradualisht në një fazë ngadalësimi.
Nëse edhe kjo thirrje do të dështojë, projekti “LIFT Tower” rrezikon të kthehet në një precedent domethënës për politikat e zhvillimit urban, duke sinjalizuar se modeli aktual i projekteve të mëdha, me kosto të lartë dhe kërkesa të forta ndaj sektorit privat, mund të mos jetë më i qëndrueshëm në kushtet aktuale të tregut shqiptar. /skyweb.al
