Në një kohë kur qytetarët dhe bizneset po përballen me bllokime të shpeshta, rënie të shërbimeve dhe probleme serioze në platformat digjitale, ministrja e Ekonomisë dhe Inovacionit Delina Ibrahimaj zgjodhi të dalë me një mesazh triumfalist për AKSHI-n, duke e quajtur “shtylla kryesore e qeverisjes elektronike dhe inovacionit”.
Ibrahimaj, bashkë me kryeministrin Edi Rama, prezantoi drejtorin e ri të Agjencisë Kombëtare të Shoqërisë së Informacionit, Igli Tafa. Në fjalën e saj, ministrja vlerësoi AKSHI-n si institucion kyç të “qeverisjes moderne”, duke e cilësuar digjitalizimin si histori suksesi dhe “krenari” për Shqipërinë.
Sipas saj, arritjet në shërbimet publike online janë dëshmi e kapaciteteve të stafit dhe e vizionit afatgjatë, ndërsa Shqipëria, siç deklaroi, renditet ndër vendet me nivel të avancuar të ofrimit të shërbimeve elektronike.
Por këto deklarata vijnë në një realitet krejt tjetër. Thuajse të gjitha sistemet e ngritura nga AKSHI dhe të implementuara nga kompanitë e prokuruara prej tij, kryesisht Soft and Solution apo Advanced Business Solutions, raportohen me probleme të theksuara funksionimi. Në të njëjtën kohë, ky ekosistem kontratash dhe ndërhyrjesh është nën hetim për korrupsion madhor dhe, sipas akuzave, edhe për pengmarrje në kuadër të një grupi të strukturuar kriminal, një skemë ku tenderët dhe presioni ndaj kundërshtarëve përmenden si pjesë e modus operandi.
Pavarësisht kësaj situate, ministrja foli për objektiva “ambicioze” për vitin 2026, me fokus e-Albania 2.0 dhe shtrirjen e saj të plotë edhe në pushtetin vendor, si edhe kalimin te shërbimet proaktive të bazuara në ngjarje jetësore, për të reduktuar procedurat dhe për të lehtësuar aksesin.
Një tjetër prioritet që Ibrahimaj e cilësoi “madhor” është modernizimi i portalit të prokurimeve publike, me pretendimin se kjo do të rrisë transparencën, efikasitetin dhe integritetin në menaxhimin e fondeve publike.
Në këtë sfond, mesazhi i ministres ngjan si një deklaratë nga një realitet paralel: teksa sistemet bien, shërbimet ngecin dhe skemat e tenderëve përmenden në hetime të rënda penale, Ibrahimaj shpall AKSHI-n “shtyllë” dhe “histori suksesi”. /skyweb.al
